Kuvendi do të votojë në seancën e të enjtes emrat e rinj për dy prej institucioneve të rëndësishme të Vettingut, Këshillin e Lartë të Prokurorisë dhe Këshillin e Lartë Gjyqësor.
Partia Demokratike akuzoi sot maxhorancën se në listën që i ka shkuar Kuvendit, janë futur qëllimisht kandidatë me probleme ligjore, shkruan Panorama.
Këtë PD-ja e argumentoi duke nxjerrë disa dokumente për kandidatët.
Njëri prej tyre është Kozma Jano, i propozuar nga avokatët për në Këshillin e Lartë të Prokurorisë.
Sipas selisë blu, Kozma Llaqi Jano i ditëlindjes 1956 në Lushnje, është rekturuar nga Sigurimi i Shtetit në 29 qershor 1977, pra 21 vjeç në kategorinë “Informator” me pseudonimin “telefoni”.
Sipas kartelës model 2 të publikuar sot nga PD veprimtarinë ai do ta kryente në portin e Durrësit.
Dokumenti mban firmën e zv.titullarit Kapllan Shehu, raporton Panorama.
Ndërkohë, në një dokument tjetër të publikuar sot nga PD, thuhet se në 8 shtator 1978 ai “u muar në lidhje” dhe mban në krah emrin e Myftar Gjoncajt.
Ndërsa në 27.9.1979 në të njëjtin dokument të Sigurimit të Shtetit thuhet se ai është liruar nga policia dhe dosja është asgjësuar.
Por PD-ja publikoi sot edhe një tjetër dokument që e nxjerr Kozma Janon anëtar të Partisë Komuniste.
Konkretisht, në zgjedhjet e vitit 2011 ai ka kandiduar për këshilltar bashkiak në Bashkinë e Lushnjes nën siglën e Partisë Komuniste të Shqipërisë.
