Mbreti meksikan i drogës Ismael “El Mayo” Zambada u arrestua nga agjentët amerikanë të enjten pasi një anëtar i lartë i kartelit Sinaloa e futi në kurth duke e bindur të udhëtonte me avion për në Teksas.
Joaquín Guzman Lopez, djali i bosit të burgosur të drogës Joaquin “El Chapo” Guzman, gjithashtu ishte në të njëjtin aeroplan dhe u arrestua pas uljes së mjetit fluturues në pistë, tha një zyrtar i Hetimeve të Sigurisë Kombëtare.
76-vjeçari Zambada bashkëthemeloi kartelin Sinaloa tre dekada më parë me bosin e drogës El Chapo.
Ai drejton një fraksion të kartelit që konsiderohet si kontrabanduesi kryesor i fentanilit në SHBA.
Futja në kurth
Zambada mendoi se do të inspektonte fusha ajrore klandestine në Meksikë, por në vend të kësaj u dërgua në El Paso, Teksas, ku ai dhe Guzman më i ri u arrestuan sapo aeroplani u ul në pistë, tha zyrtari i HSI.
Shtetet e Bashkuara kishin ofruar një shpërblim prej 15 milionë dollarësh për informacionin që çonte në arrestimin e Zambada.
Kjo është goditja e fundit e pësuar nga karteli Sinaloa, i cili ka qenë një objektiv kryesor për zbatimin e ligjit në SHBA. Në janar 2023, Ovidio Guzmán, djali tjetër i El Chapo, u arrestua dhe më vonë po atë vit u ekstradua në SHBA, ku përballet me akuza për drogë.
Néstor Isidro “El Nini” Pérez Salas, u kap në nëntor dhe u ekstradua në SHBA në fillim të këtij viti.
El Chapo, një bos droge i njohur për arratisjet e tij spektakolare nga burgu, u ekstradua në SHBA në vitin 2017 dhe u dënua me burgim të përjetshëm në vitin 2019.
Ndryshe nga Guzmán, Zambada ishte i njohur për mbajtjen e një profili të ulët. Në Culiacán, kryeqyteti i shtetit Sinaloa dhe vendlindja e kartelit, Zambada shihej si pjesë e kartelit që mbante rendin dhe mbronte qytetin nga sulmet e grupeve rivale, thanë banorët.
Joaquín Guzmán López është një nga katër vëllezërit, duke përfshirë Ovidio Guzmán, të cilët njihen si “Los Chapitos”. Sipas autoriteteve, ata ishin gjithashtu trafikantët kryesorë të fentanilit në SHBA. Ovidio Guzmán shihej si një pionier i tregtisë së fentanilit në Meksikë.
NDIQE LIVE "PANORAMA TV" © Panorama.al