Personi i vrarë në lokal tek ish-Blloku, Elton Çiça, 36 vjeç, nga Tepelena, ka pasur një armë tip pistoletë me vete natën e krimit. Kjo armë që mbante me vete djali i dy të moshuarve të grabitur në Tepelenë është zhdukur. Pikërisht zhdukja e kësaj arme ka sjellë arrestimin e dy personave që ndodheshin në vendin e ngjarjes në lokalin që ndodhet pranë stadiumit “Selman Stërmasi”.
I pari që ra në pranga të nesërmen e ngjarjes ishte mjeku Redjan Rraja, i cili u akuzua për pengim në zbulimin e së vërtetës, pasi kishte prekur armën e Elton Çiçës dhe kufomën e tij. Por mosgjetja e armës së zjarrit që mbante viktima me vete në tavolinën ku ishte ulur, i detyroi hetuesit të vazhdojnë verifikimet në lidhje me këtë fakt.
Verifikimi i parë u bë duke sekuestruar kamerat e sigurisë brenda dhe jashtë objektit në lokalin “De Niro”, ku ndodhi ngjarja. Pas lënies në arrest me burg nga gjykata të mjekut Redjan Rraja, Prokuroria e Tiranës ka dorëzuar dje në gjykatë edhe kërkesën për masën e sigurisë ndaj policit Alban Trimi. Grupi i hetimit ka kërkuar në gjykatë caktimin e masës arrest me burg edhe për oficerin e Antidrogës, me akuzën se ka penguar hetimet.
MOMENTI I VRASJES
Referuar pamjeve të regjistruara, grupi i hetimit saktësoi faktin se Elton Çiça kishte hyrë në lokal disa minuta para se të vritej, duke pasur me vete një armë zjarri pistoletë. Këtë armë ai e ka mbajtur pasi është ulur në tavolinën ku ndodhej oficeri i Policisë, Alban Trimi. Në tavolinë ka qenë edhe mjeku Redjan Rraja dhe gazetari Spartak Koka.
Disa minuta më pas, një person me kapele në kokë ka hyrë në lokal dhe pasi është drejtuar direkt te tavolina ku ndodhej Elton Çiça, ka qëlluar tri herë me armë zjarri ndaj tij. Viktima 36 vjeç nga Tepelena ka marrë dy plumba në kokë dhe një në gjoks, duke gjetur vdekjen brenda pak sekondave.
Pas të shtënave mbi viktimën Elton Çiça, autori i krimit është kthyer mbrapsht dhe është larguar duke vendosur armën në brez, por duke mbajtur dorën sipër saj, derisa ka dalë nga lokali. Më pas, kamerat kanë filmuar disa veprime në skenën e krimit, të cilat pasi janë analizuar, kanë çuar në pranga policin e Antidrogës Alban Trimi dhe mjekun Redjan Rraja.
ZHDUKJA E ARMËS
Burime të Prokurorisë së Tiranës, e cila po heton ngjarjen, thanë se është provuar fakti se viktima Elton Çiça ka pasur me vete në vendngjarje një armë zjarri pistoletë.
Po kështu, nga pyetja e dëshmitarëve dhe këqyrja e përsëritur e kamerave të sigurisë, ka dyshime serioze se polici Alban Trimi dhe mjeku Redjan Rraja kanë bashkëpunuar mes tyre në marrjen e pistoletës dhe më pas zhdukjen apo fshehjen e saj. Siç dyshon Prokuroria, i pari që ka prekur armën e viktimës ka qenë Redjan Rraja.
Ai dyshohet se ka kryer veprime për të fshehur pistoletën dhe celularin e Elton Çiçës, pasi ai kishte rënë në tokë nga plumbat. “Redjan Rraja dyshohet se ka vepruar i pari, pasi është filmuar teksa merrte pistoletën nga çanta e Çiçës dhe bashkë me Alban Trimin, dalin jashtë nga lokali në ndjekje të autorit. Në kamera duket edhe momenti kur Rraja mbush pistoletën, por pasi konstatuan se vrasësi ishte larguar nga lokali, ata janë kthyer brenda në lokal”, thanë burimet e hetimit.
Sipas tyre, personi i fundit që ka mbajtur armën ka qenë oficeri i Policisë Alban Trimi. Nga ana tjetër, Prokuroria thotë se në procesverbalin e vendngjarjes nuk është shënuar që pistoleta të jetë gjetur në vendin e krimit.
TRAZHGIM SOKOLAJ
NDIQE LIVE "PANORAMA TV" © Panorama.al
