Ndërkohë që Partizani stërvitet dhe vijon sezonin, po punohet me intensitet maksimal edhe në kompleksin e të kuqve, ku investimet e presidentit Demi janë përqendruar më së shumti te stadiumi.
Ditën e djeshme “Panorama Sport” vizitoi kompleksin “Partizani”, ku pavarësisht se skuadra stërvitej, rreth e qark punohej me ritëm të lartë.
Në pjesën e jashtme të stadiumit janë vendosur vizimet e nevojshme të parkingut para stadiumit, si dhe janë instaluar kangjellat, që e ndajnë atë me pjesën tjetër të kompleksit, që nuk ka nisur ende punimet për shkak se po vonon leja e shembjes së godinave të ish-hartografisë.
Ndërkohë, në tribunën përballë ka përfunduar thuajse totalisht vendosja e gardhit rrethues dhe është bërë edhe ndarja e nevojshme e sektorit ku do të qëndrojë tifozëria mike me pjesën tjetër.
Përveç kësaj në të katërt cepat e stadiumit janë vendosur barriera gjigante metalike, si dhe porta të mëdha, që nuk lejojnë daljen e topit jashtë, por edhe kufizojnë hyrjen e personave të paautorizuar.
Aktualisht, i vetmi element që e pengon Partizanin në të luajë ndeshje të Superiores në stadiumin e vet është fakti që fusha është sintetike, pasi rrethimi është bërë sipas çdo kushti të FSHF-së, madje edhe të UEFA-s.
Ndërkohë, punimet vazhdojnë intensivisht edhe te hoteli, ku po përfundohen instalimet elektrike dhe hidraulike.
Gjithashtu në vijim pritet të bëhet i mundur edhe përdorimi i ndriçimit të stadiumit.
PANORAMASPORT.AL
NDIQE LIVE "PANORAMA TV" © Panorama.al
