Deputeti i PD-së, Arbi Agalliu ka reaguar pas gjobës 3.6 mln euro të vendosur ndaj “Birra Tirana”. Me anë të një postimi në rrjetet sociale, ai thotë se “gjoba është mënyra e gabuar e të qeverisurit”.
Teksa i referohet rastit të “Birrës Tirana”, ligjvënësi demokrat thotë se shteti ka detyrim të nxisë zhvillimin e biznesit vendas, të jetë konsulent dhe jo të vendosë gjoba.
“Biznesi vendas është gjëja më e ndershme në këtë vend. Është pikërisht ky biznes që mbush buxhetin e shtetit të shpuar nga të gjitha anët, është ky biznes që paguan pagat e kësaj administrate shpesh të korruptuar, është ky biznes që paguan pensionet, spitalet, shkollat, rrugët dhe çdo gjë tjetër”, shkruan deputeti i PD.
Reagimi i Arbi Agalliut
Gjoba është mënyra e gabuar e të qeverisurit!
Të vendosësh një gjobë është mjaft e lehtë, qoftë kjo dhe me të pa drejtë.
Ajo që shteti ka detyrim është të nxisë zhvillimin e biznesit vendas, të përmirësojë paketën fiskale në funksion të biznesit vendas, të jetë konsulent i tyre e jo të vendosë gjoba (sikurse po shoh rastin e Birra Tirana).
Biznesi vendas është gjëja më e ndershme në këtë vend. Është pikërisht ky biznes që mbush buxhetin e shtetit të shpuar nga të gjitha anët, është ky biznes që paguan pagat e kësaj administrate shpesh të korruptuar, është ky biznes që paguan pensionet, spitalet, shkollat, rrugët dhe çdo gjë tjetër.
Ndaj, në vend që t’i vendosen gjoba, biznesit vendas i duhet ofruar ndihma dhe konsulenca e duhur, duke e trajtuar si partner e jo si një lopë që vetëm milet.
NDIQE LIVE "PANORAMA TV" © Panorama.al
