Formati i ri i Europianit me 24 ekipe është bërë pikërisht që të ndodhin raste si Gjeorgjia, e cila vazhdon të shkruajë histori në kompeticion dhe do të përballet me Spanjën në 1/8 e finaleve të dielën në Këln. Skuadra e drejtuar nga Vili Sanjol nuk kishte marrë kurrë pjesë në një kampionat evropian në historinë e saj. Për ta ishte një arritje e vërtetë që ndodheshin në fazën finale.
Por Gjeorgjia ka bërë shumë më tepër, duke arritur një kualifikim për në 16 më të mirat që absolutisht askush nuk e priste. Shumë pranë me ta ishte Shqipëria, por ishte Spanja që ia prishi ëndrrat. Ndryshe nga skuadra e Silvinjos, Gjeorgjia arriti të përmbushte misionin e saj duke mundur një Portugali që mund të thuhet skuadra B për të siguruar një vend në 1/8 e finaleve. Duhej të ishte një ndeshje në të cilën u shfaq ylli i tij i madh i Gjeorgjisë, Kviça Kvaratskelia, lojtari me të cilin Luis de la Fuente do të duhet të jetë i kujdesshëm të dielën në mbrëmje.
Anësori i Napolit është mëse i njohur. Prej dy sezonesh emri i tij është i lidhur me të mëdhenjtë e Europës dhe që në moshën vetëm 23-vjeçare është një nga futbollistët më të talentuar në qarkullim. Një yll me një histori kurioze. Ndërkohë që për futbollistët e brezit të tij, gjëja logjike do të kishte qenë të kishin referencë Leo Mesin, Ronaldinjon, Kristiano Ronaldon apo ndonjë yll të asaj kohe, Kviça lindi dhe mësoi duke pasur për idhull një spanjoll.
Nuk ishte as Ksavi dhe as Iniesta. Ai ishte Hoze Maria Gutierrez Hernandez, i njohur më së shumti si “Guti” dhe që veshi fanellën e Realit të Madridit për 15 sezone. “Dashuria ime e parë ishte Guti, nga Reali. Kur luaja me miqtë e mi në Tbilisi, qyteti im, ne vishnim bluza të bardha dhe unë shkruaja emrin e tij në shpinë” rrëfeu “Kvaradona” në vitin 2023.
Pa pasur aspak lidhje me Gutin si futbollist, mund të thuhet se i vetmi tipar që ndajnë është ai i një talenti të paçmuar. Kvaratskelia ishte një nga liderët që e shpalli Napolin kampion të Serisë A dhe historia e tij e madhe ka vazhduar me Gjeorgjinë në këtë Europian. Ai dikur ëndërronte të ishte Guti dhe është në rrugë për ta kapërcyer atë, duke u përballur me Spanjën në moshë shumë të re.
PANORAMASPORT.AL
NDIQE LIVE "PANORAMA TV" © Panorama.al
