Presidenti Ilir Meta po vijon vizitën në Dibër të Madhe ku do të marrë pjesë në ceremoninë e 111-vjetorit të Kongresit. Kreu i shtetit ka nderuar figurën e heroit tonë kombëtar Gjergj Kastriot Skënderbeu duke u përulur dhe duke vendosur një buqetë para shtatores së tij.
“U përula me respekt e nderim para veprës së Tij, përherë frymëzuese dhe udhërrëfyese e qartë për të kapërcyer çdo sfidë dhe garantuar të ardhmen tonë europiane!”, shprehet Meta.
Statusi i plotë i presidentit
Sot në Dibër të Madhe, në këtë trevë të bekuar nga Zoti, vend i trimërisë, i besëlidhjes, i mençurisë dhe urtësisë, i fjalës dhe i pushkës, ku dështoi çdo ekspeditë e ushtrive pushtuese dhe që krenohet në çdo epokë me gjithçka i ka dhënë çështjes shqiptare. Në veçanti Dibra është vendi i origjinës së Kastriotëve dhe Heroit tonë Kombëtar, Skënderbeut, simbolit më përbashkues dhe shqiptarit më të gjallë ndër të gjallë, i cili përcaktoi qartë identitetin europian të kombit tonë.
****
Ilir Meta në Dibrën e Madhe/ Presidenti përshëndet banorët vendas: Shumë i lumtur të jem pranë motrave e vëllezërve
Presidenti Ilir Meta u ndal sot në Dibër të Madhe ku po merr pjesë në ceremoninë kushtuar 111-vjetorit të “Kongresit të Dibrës”. Kreu i shtetit ka publikuar disa foto teksa përshëndetet me disa banorë vendas.
Përmes një postimi në “Facebook” bashkëngjitur me foto kreu i shtetit shprehet: “Shumë i lumtur të jem sot pranë motrave e vëllezërve të dashur të Dibrës së Madhe të Kastriotëve, Iljaz Pashë Dibrës, Josif Bagerit, Dom Nikoll Kaçorrit, Vehbi Dibrës e shumë patriotëve e intelektualëve të tjerë, për të kremtuar së bashku 111-vjetorin e Kongresit të Dibrës”.
****
“Mirësevjen në Dibër Presidenti Ilir Meta”/ Kreu i shtetit sot në përvjetorin e ngjarjes së rëndësishme të kombit
Presidenti Ilir Meta do të jetë sot në Dibër të Madhe për të marrë pjesë në ceremoninë solemne kushtuar 111-vjetorit të “Kongresit të Dibrës”, kongres i cili ishte pikënisje e kryengritjeve mbarë kombëtare për liri dhe pavarësi.
Gjatë qëndrimit të tij në Dibër të Madhe, Presidenti Meta pritet të takohet dhe me krerë të Institucioneve të larta Qendrore e Vendore të Maqedonisë së Veriut dhe përfaqësues të partive politike shqiptare.
Siç shihet edhe nga kjo foto, banderola me mbishkrimin “Mirësevjen në Dibër Presidenti Ilir Meta” janë shpalosur në rrugët e qytetit.
NDIQE LIVE "PANORAMA TV" © Panorama.al
