Sekretari i Përgjithshëm i PD-së, Flamur Noka, Kryetari i Grupit Parlamentar, Gazment Bardhi dhe Koordinatori i Rajonit të Tiranës, Klevis Balliu dhe drejtues të zonës, kanë zhvilluar takime me banorët e Kombinatit në Tiranë, këtë të shtunë.
Gjatë takimeve të tij më qytetarët, Noka u ka bërë thirrje t’i bashkohen protestës së datës 11 Korrik kundër saj të cilën ai e cilësoi “regjimit autokrat e antishqiptar të Edi Ramës”.
“Protestës së 11 korrikut duhet ti bashkohet çdo familje, çdo biznes, çdo qytetar, që është prekur nga regimi autokrat i Ramës. Synimi i vetëm i tij është të pasurojë veten, familjarët e tij, ministrat, zyrtarët, drejtorët, duke lënë në mjerim ekonomik shqiptarët, të cilët rrugë të vetme për të shpëtuar nga ky regjim kriminal e banditesk gjejnë largimin nga vendi,” u shpreh Noka teksa shpërndante fletushka në zonën e Kombinatit.
Noka gjithashtu i bëri thirrje çdo demokrati, i cili kërkon ndryshimin dhe largimin e qeverisë më të korruptuar jo vetëm në rajonin e Ballkant por edhe më gjerë, të marrë pjesë në protestën e opozitës së bashkuar më 11 korrik, në një betejë pa kthim, deri në formimin e një qeverie teknike dhe vendosjen para drejtësisë të hajdutëve të taksave të shqiptarëve.
Zona e Kombinatit është një nga zonat më të prekura nga tërmeti i 2019-ës, banorët e të cilit ende nuk janë kompensuar për dëmet e shkaktuara, ndërsa bashkia u shemb çdo ditë pallate e ndërtesa për të hapur sheshe ndërtimi për miqtë e kryebashkiakut.
