Të tjera detaje janë zbardhur nga shpërthimi me eksploziv në derën e një banesë në Elbasan, ku për pasojë mbeti i plagosur një 26-vjeçar, i cili jetonte në banesën ngjitur ku ndodhi shpërthimi.
Sipas News24, i plagosur në gjendje të rëndë është Enea Themollari, 26 vjeç, i cili është transportuar në spitalin e Traumës në Tiranë.
Ai mbeti aksidentalisht i plagosur nga shpërthimi i një sasie tritoli që u vendos në mesnatë në hyrjen e apartamentit të fqinjit në pallatin ku ai jetonte.
Sipas policisë dyshohet se objekt i atentatit ishin dy motra që jetonin me qira në lagjen “Haxhias”. Tritoli ishte vendosur në korridorin e katit të 4-t të pallatit në derën e hyrjes në pronësi të njé 59 vjeçari.
“Rreth orës 02:30, në lagjen “Haxhias”, në korridorin e katit të 4-t të një pallati në derën e hyrjes në pronësi të shtetasit B. B., 59 vjeç, në të cilën jetonin me qira dy shtetase ka shpërthyer një sasi lënde e dyshuar plasëse.
Si pasojë janë shkaktuar dëme materiale. Ndërkohë po nga shpërthimi është dëmtuar aksidentalisht nga dera e dhomës së tij shtetasi E. Th., rreth 26 vjeç, i cili banon në hyrjen përballë. 26-vjeçari momentalisht është jashtë rrezikut për jetën.
Është ngritur një grup i posaçëm hetimor me specialistë për Hetimin e Krimeve të Rënda të Drejtorisë Vendore të Policisë Elbasan dhe Departamentit të Policisë Kriminale në drejtimin e Prokurorisë, vijojnë punën për zbardhjen e rastit, identifikimin e kapjen e autorit/ve”, thuhet në deklaratën zyrtare të Policisë.
NDIQE LIVE "PANORAMA TV" © Panorama.al
