Alvarez i pakënaqur te Mançester Siti, PSG gati të joshë argjentinasin
Mund të jetë një lajm me të vërtetë surprizë, por Julian Alvarez mund të largohet nga Mançester Siti në merkaton e kësaj vere. Kampioni i botës me Argjentinën ka qenë një lojtar i rëndësishëm për skuadrën e Pep Guardiolës, por ai mund të kërkojë një mundësi larg “Etihad” për të qenë pjesë e një projekti ku ai mund të ndihet edhe më i rëndësishëm.
Fabricio Romano, eksperti italian i merkatos raporton se e ardhmja e ish-talentit të River Plejtit do të jetë një temë e nxehtë në merkaton e kësaj vere. Romano konfirmon gjithashtu se ka një interes të fortë nga ana e PSG-së për futbollistin, i cili admirohet edhe nga Atletiko e Madridit. Ai është aktualisht zgjedhje e dytë në “Etihad”, ku çelësat e sulmit Guardiola ia ka besuar Erling Halandit. Dëshira e tij është që të qëndrojë, por kërkon që të ketë një rol më të rëndësishëm në skuadër sezonin e ardhshëm, që për momentin Guardiola nuk ia garanton.
Por trajneri katalanas e vlerëson shumë talentin e tij, duke qenë se ai nuk luan vetëm si një sulmues i mirëfilltë, por operon në shumë zona në fushë, përfshirë atë të rolit të numrit 10. Kontrata e tij në “Etihad” skadon në 30 qershor të vitit 2028.
PANORAMASPORT.AL
NDIQE LIVE "PANORAMA TV"![](https://www.panorama.com.al/sport/wp-content/static/klikoperkepanoramaonline.jpg)