Tirana e basketbollit të femrave mbylli një sezon fantastik duke u shpallur kampione e Shqipërisë. Në shtëpinë bardheblu duan që ta mbrojnë këtë status edhe për sezonin 2024-2025, teksa kanë nisur punë për formatimin e skuadrës. Kryeqytetaset e kanë hapur merkaton me një rinovim të rëndësishëm, duke njoftuar se kapitenia Aida Palko do të mbetet bardheblu.

“Aida Palko do të jetë edhe për një sezon bardheblu. Kapitenia e vajzave të basketbollit ka rinovuar e para, duke i hapur rrugën formatimit të ekipit për sezonin e ri sportiv 24/25, ku vajzat e Tiranës do të synojnë çdo trofe të mundshëm në kompeticionet që do të marrin pjesë”, shkruan Klubi Shumësportësh Tirana, teksa zyrtarizon nënshkrimin e Palkos.

Ndonëse në moshë 40- vjeçare, Palko vijon të bëjë diferencën në basketbollin shqiptar. Lojtarja gjirokastrite ishte ndër protagonistet kryesore në fitimin e titullit kampion për skuadrën që drejtohet nga Mirza Alibegaj, duke spikatur gjithnjë, sidomos në ndeshjet me rivalet e drejtpërdrejta si Partizani dhe Flamurtari.

PANORAMASPORT.AL

NDIQE LIVE "PANORAMA TV"

---