BASKETBOLL/ Besëlidhja leksion Kamzës, Teuta shkëlqen në Fier
Kampionati kombëtar i basketbollit për meshkuj ka mbyllur dje javën e dytë me sfidën ndërmjet Besëlidhjes dhe Kamzës në “Asllan Rusi”. Lezhjanët vijojnë të tregojnë një formë mjaft të mirë në këtë fillimsezoni, teksa pas suksesit në Kupën e FSHB-së, tashmë koleksionuan edhe fitoren e dytë në kampionat.
Skuadra e Afrim Bilalit bëri një tjetër paraqitje bindëse, duke triumfuar ndaj një rivali direkt si Kamza në shifrat 100-69 (27- 21, 16-20, 28-20, 29-8). Edhe një herë tjetër ekipi verior shfaqi rendiment të lartë në sulm.
Besëlidhja tregoi gjithashtu sërish përgatitje më të lartë fizike se kundërshtarët, duke e bërë diferencën në gjysmën e dytë të ndeshjes, sidomos në periodën e fundit, të cilën e fitoi me plot 21 pikë epërsi, për të vulosur edhe triumfin treshifror.
Nga ana tjetër, Kamza provoi të rezistonte, por me kalimin e minutave loja e skuadrës së Eni Llazanit erdhi në rënie. I gjithë formacioni i Besëlidhjes shkoi në dopioshifër pikësh në këtë takim, ndërsa rendimentin më të lartë e kishte amerikani Weekes, autor i 27 pikëve dhe 12 kërcimeve.
Për Kamzën efikasitetin më të lartë e kishte Porter me 18 pikë. Më këtë fitore Besëlidhja ngjitet në vend të parë, me pikë të barabarta me Elbasanin, por lezhjanët kanë diferencë më të mirë koshash.
Në javën e dytë është zgjuar edhe Teuta, teksa durrsakët morën një fitore mjaft të bukur në transfertë kundër Apolonisë në shifrat 71-94 (27-23, 12-28, 14-21, 18-22). Ndonëse vendësit kishin mbështetjen e zjarrtë të publikut, Teuta tregoi maturinë e duhur, duke u shkaktuar disfatën e parë fierakëve në sallën e re.
Pas një fillimi disi më të mirë të Apolonisë, miqtë e drejtuar nga Nikola Milatoviç morën frenat e lojës në kontroll.
Paraqitje shumë e mirë nga të gjithë amerikanët e Teutës, ndërsa MVP u shpall Bacon, autor i 25 pikëve, 7 kërcimeve dhe 8 asisteve. Shkëlqeu edhe kapiteni Kristi Gorea, protagonist me 17 pikë, 6 kërcime dhe 6 asistime. Për fierakët rendimentin më të lartë e kishte Jones me 16 pikë e 14 kërcime.
Partizani ka marrë fitoren e parë, teksa ka mundur Skënderbeun me rezultatin e thellë 54-91. “Demat” e Erdal Borovës u argëtuan në transfertën korçare përballë një kundërshtari modest, duke dhuruar edhe shou me disa kosha spektakolarë.
Në ndeshjet e zhvilluara të premten, Tirana mundi Vllazninë 92-66, ndërsa Elbasani fitoi ndaj Fierit 98-68.
A.DUSHKU/N.GOCI – PANORAMASPORT.AL
NDIQE LIVE "PANORAMA TV"![](https://www.panorama.com.al/sport/wp-content/static/klikoperkepanoramaonline.jpg)