Vllaznia, me t’u kthyer në Shkodër nuk ka vonuar shumë për të nisur stërvitjen. Trajneri Tomas Brdariç nuk ka pasur kohë për të humbur, pasi përpara është ndeshja e kthimit me Valurin, ku kuqeblutë duan kualifikimin.

Me përjashtim të Ildi Grudës, i cili do të mungojë edhe për sfidën e dytë me islandezët për shkak dëmtimi, ka pasur të gatshëm gjithë pjesën tjetër të ekipit.

Mungesë në fakt nuk është vetëm Gruda, por edhe Deliu, i cili la fushën pas dy kartonëve të verdhë në ndeshjen e parë me Valurin. Vendin e lojtarit të ardhur nga Tirana pritet ta zërë 20-vjeçari Rejan Alivoda, një nga titullarët më të rëndësishëm të sezonit të shkuar. Lojtarët nuk kanë shfaqur probleme fizike dhe janë gati për trajnerin gjerman.

FORMACIONI – Pavarësisht se ka edhe dy ditë në dispozicion, trajneri Brdariç duket se do të bëjë vetëm një lëvizje në formacion, në krahasim me ndeshjen e parë kundër Valurit, që përfundoi 2-2. Edhe kjo lëvizje është e detyruar, për shkak të kartonit të kuq të Deliut. Alivoda do të zërë vend në mesfushë, përkrah Krymit dhe Qatos.

Pjesa tjetër e skuadrës nuk ndryshon, me Qarrin në portë dhe Gurishtën, Bajramin, Stojanoviç dhe Juriç në mbrojtje. Në sulm, Balaj dhe Mala do të kenë mbështetjen e Kahrimanoviçit. Me këtë lojtarë, por edhe alternativat që ka në stol, Vllaznia do të synojë që të kalojë në turin tjetër të Ligës së Konferencës.

PANORAMASPORT.AL

NDIQE LIVE "PANORAMA TV"

---