Dinamo bën një goditje surprizë në minutat e fundit të merkatos së janarit. Blutë kanë gjetur zëvendësuesin e Mirel Çotës, lojtarit që u largua për te Turbina disa ditë më parë.

Dinamo ka zyrtarizuar dje Mario Morinën, një lojtar me eksperiencë, i cili do të veshë fanellën e skuadrës blu.

Goditja – Mbas largimit të Mirel Çotës, reparti i sulmit kishte mbetur thuajse bosh te Dinamo, pasi Markovanbasten Çema ishte sulmuesi i vetëm.

Në këtë mënyrë, drejtuesit kanë bërë goditjen e fundit në limitet e mundësisë për transferime. Administratori Ismet Saliaj ka rënë dakord me Mario Morinën dhe ky i fundit firmosi me blutë për të luajtur për pjesën e mbetur të sezonit.

Futbollisti ka nënshkruar zyrtarisht dje pasdite dhe i është bashkuar menjëherë skuadrës. Me Morinën pritet që “hallet” e sulmit të kryeqytetasve të zgjidhen.

Lojtari ka qenë më parë pjesë e ekipeve si Tirana, Flamurtari, Kamza dhe së fundmi Besës në pjesën e parë të kampionatit. Megjithatë, eksperienca në Kavajë është për t’u harruar për futbollistin.

Ai u afrua me shumë bujë te Besa gjatë merkatos së verës, por u aktivizua vetëm në pak ndeshje. Më pas u largua nga ekipi ende pa përfunduar pjesa e parë e kampionatit.

Ndërsa, në janar u zyrtarizua edhe divorci me skuadrën e Besës. Kjo ishte një goditje surprizë e skuadrës së Dinamos në momentet e fundit të merkatos së janarit.

Ekipi ka afruar lojtarë të rëndësishëm dhe pritet që ekipit të paraqitet më mirë në këtë pjesë të dytë të kampionatit.

Kujtojmë se Dinamo e nisi në mënyrën më të mirë të mundshme këtë vit duke barazuar në një transfertë të vështirë në Rrogozhinë ndaj Egnatias vendëse.

S.Sulozeqi

NDIQE LIVE "PANORAMA TV"

---