Karlo Ançeloti gjendet përballë sfidës së radhës në turneun e tij, Ligën e Kampioneve. Trajneri italian, është gati të luftojë për medaljen e kampionit të radhës në një karrierë që e ka parë të triumfojë si askush tjetër. Ashtu si një vit më parë, në rrugëtimin e tij është përsëri Mançester Siti, por këtë radhë me një armë më shumë, Erling Haland.

Pikërisht atij i ka kushtuar vëmendje sot trajneri italian, në konferencën për shtyp para sfidës, por duke theksuar se Siti mbetet një ekip shumë i fortë edhe pa kontributin e norvegjezit. Ai e filloi konferencën para mediave duke konfirmuar se Modriç do të ishte përsëri në fushë.

“Si të ndalim Haland? Ai është shumë i rrezikshëm, ka disa cilësi mbresëlënëse në shënimin e golave. Nuk duhet të bëjmë një ndeshje si të ndalim Haland, por duhet të ndalim një skuadër që duket e pandalshme. Kemi disa opsione, mund të fitojmë ndeshjen.

Me të është një skuadër më e kompletuar. Vitin e kaluar kishin një sulmues shumë të rrezikshëm si Gabriel Zhezus, por shumë i ndryshëm nga Haland. Tani përfitojnë edhe nga topi i gjatë, kanë përfituar në shumë ndeshje prej këtyre situatave. Kjo nuk do të thotë se kanë ndryshuar stil. Janë shumë të organizuar në mbrojtje dhe luajnë mirë me topin.

Mbrojtje apo sulm? Nëse mbrohesh mirë, rezultati më i keq është barazimi. Kjo nuk do të thotë që nuk do të sulmojmë. Të mos harrojmë se në vitin e kaluar kemi pësuar 5 gola e kemi shënuar 6 ndaj Sitit në dy ndeshje. Do të isha gati të firmosja për të bërë të njëjtën gjë këtë vit”, tha trajneri italian para gazetarëve.

PANORAMASPORT.AL

NDIQE LIVE "PANORAMA TV"

---