“Muri” kuqeblu do të thyhej nga Kinostudio pas 12 javëve. Ajo që prishi rekordin e Vllaznisë ishte qendërsulmuesja 15-vjeçare, Esi Lufo. Në një intervistë për “Panorama Sport”, e reja e talentuar rrëfen emocionet e asaj sfide.

Si ndiheni pasi prishët serinë e 12 Vllaznisë që nuk pësonte prej 12 ndeshjesh?

Është një ndjesi e papërshkrueshme të thyesh këtë tabu që vazhdonte prej 12 ndeshjesh. Do të ishte akoma më e bukur nëse do të fitonim.

Si shkoi aksioni që çoi në finalizimin tuaj me gol?

Ishte një top i ardhur nga lart dhe u kthye në zonë nga sulmuesja tjetër Klarita. Aty u ndodha në kontakt me topin, driblova një nga mbrojtëset e Vllaznisë dhe më pas e gjuajta në portë. Falë një pakujdesie të portieres kundërshtare arrita të shënoj.

Cili ishte reagimi i parë i portieres shkodrane pasi i shënuat?

Reagimin e saj nuk e pashë pasi festova golin, por me siguri ka ndier keqardhje dhe besoj se do të jetë mërzitur që i shënoi një 15-vjeçare.

Po nga shoqet e skuadrës?

Të gjitha vajzat ishin tejet të lumtura.

Prej sa vitesh luani futboll dhe përse zgjodhët këtë sport?

Futbollin e kam filluar që e vogël, por Kinostudio është ekipi i parë dhe besoj i vetmi në Shqipëri. Kam zgjedhur këtë sport, pasi është diçka që me të vërtetë e bëj me pasionin më të madh. Është një sport që të fal emocione shumë të veçanta.

Ju jeni edhe pjesë e Kombëtares së U-19?

Po, e vërtetë. Grumbullimi im i parë me kombëtaren ka qenë në ndeshjen miqësore që u zhvillua me Malin e Zi.

Cili është idhulli juaj në futboll?

Idhulli im është Ronaldinjo, ndërsa te femrat preferoj Aleks Morgan.

Me cilën skuadër jeni tifoze në Shqipëri, po në kampionatet e huaja?

Jam tifoze e Partizanit, Barcelonës e Milanit

Keni ndonjë parashikim se kush e fiton titullin kampion në Shqipëri?

Besoj se Partizani do të dalë kampion. Ndërsa nga femrat, tashmë dihet.

A keni një dedikim për golin e shënuar ndaj shkodraneve?

Dedikimi i golit normalisht shkon për trajnerin për punën që bën. U duk qartë që e festova golin me trajnerin në pankinë.

NDIQE LIVE "PANORAMA TV"

---