Etrit Berisha pritet në Serinë A. Paraqitjet me SPAL-in kanë mjaftuar që emri i portierit të Kombëtares të përfundojë në listën e klubeve në elitën e futbollit italian, edhe pse skuadra e tij nuk ia doli që të sigurojë një vend në zonën e sipërme të tabelës (për një pikë) ku të mund të provonte shanset në fazën “play off”.

BISEDIMET

Mediat pranë qytetit të Ferrarës kanë bërë me dije se në adresë të portierit shqiptar ka ardhur një interesim konkret nga Bolonja. Largimi i mundshëm i Skorupskit ka bërë që Berisha të jetë një prej emrave me të cilin drejtuesit e Bolonjës të nisin bisedimet. Me çfarë ka treguar këtë sezon, duket se te Bolonja janë të kënaqur me profilin e portierit kuqezi dhe për këtë, në ditët në vazhdim, mund të ketë zhvillime. Berisha është në kontratë me SPAL-in, por vetë skuadra e Serisë B do të shtynte që një transferim i tillë të kryhej.

Arsyeja? Kostoja e lartë e rrogës që Berisha merr te SPAL dhe nevoja e këtij klubi për të ulur shpenzimet, duke qenë se nuk ia doli që të sigurojë një vend në Serinë A. Për këtë, duket se Berisha është i tepërt në projektin e ri të SPAL -it, diktuar pikërisht nga financat në klub. Berisha paguhet 1 milion euro neto nga skuadra e SPAL -it dhe kontrata e tij me këtë skuadër skadon në qershor 2022.

SHQIPTARËT

Me sa duket, skuadra e drejtuar nga Sinisha Mihajloviç është e fiksuar me shqiptarët. Dy ditë më herët, në mediat italiane u bë me dije se Bolonja kishte shprehur interesime për Tomas Strakoshën, një tjetër shqiptar i cili pritet të ndërrojë ambient në fund të këtij sezoni. Mbetet për t’u parë se çfarë do të ndodhë me të ardhmen e portierit 32-vjeçar të Kombëtares, por pritet që me shumë gjasë të vijojë sezonin e ardhshëm në elitën e futbollit italian, në Serinë A.

OLSI TUJANI-PANORAMASPORT.AL

NDIQE LIVE "PANORAMA TV"

---