Flamurtari rikthen sulmuesin Hoxhaj pas 4 vitesh, prezantohet edhe ish-mesfushori brazilian
Java ka nisur mbarë për Flamurtarin, ku përveç fillimit të punës për sezonin e ri, Flamurtari ka kryer dy “goditjet” e radhës në merkaton e verës.
Edhe pse mungon trajneri, vlonjatët nën drejtimin e drejtorit sportiv Artim Pollozhani kanë kryer deri tani shtatë afrime, pa llogaritur edhe rinovimet e disa titullarëve të sezonit të shkuar që u përfundoi kontrata me Flamurtarin.
ARDIT HOXHAJ- Flamurtari prezantoi dhe sulmuesin Ardit Hoxhajn. Ashtu sikundër “Panorama Sport”, zbuloi ekskluzivisht në numrin e djeshëm, Hoxhaj dje u rivesh kuqezi. 29-vjeçari rikthehet në shtëpi pas 4 vitesh. Sezoni i fundit që Hoxhaj luajti me Flamurtarin ishte 2019-2020. Me firmosjen e Hoxhajt plotësohet edhe një dëshirë e hershme e administratorit Sinan Idrizit, që e donte sulmuesin edhe sezonin e shkuar pavarësisht se zgjodhi Elbasanin. Hoxhaj e njeh mjaft mirë ambientin në Vlorë, ndërsa më parë ka patur eksperiencë në klube si Bylis, Skënderbeu, Korabi, Luftëtari, Vllaznia dhe Elbasani. Në Kosovë ku ka luajtur për Ferizajn.
RIKTHIMI I BRAZILIANIT- Flamurtari rikthen Fernando Armando dos Santos (Fenardinjo). 29-vjeçari luan në mesin e fushës dhe shihet si një përforcim i rëndësishëm për vlonjatët. Te Flamurtari luajti në sezonin 2022-2023, kur skuadra drejtohej nga Dritan Resuli. Vjet u transferua në Greqi tek AO Neas Ionias. Braziliani ka luajtur në vendlindje,në Portugali dhe në Greqi dhe rikthehet te Flamurtari për Superioren.
ERMAL SIKA- PANORAMASPORT.AL
NDIQE LIVE "PANORAMA TV"