Flamurtari ka zyrtarizuar afrimin e tretë në merkaton e verës, Aldrit Oshafin. 24-vjeçari nga Berati ka zbarkuar në Vlorë ku edhe ka nënshkruar zyrtarisht kontratën dhe më pas është prezantuar me fanellën kuqezi.

Oshafi është një lojtar me eksperiencë dhe me afrimin e tij në Vlorë, do të ishte një zgjidhje e mirë për mesin e fushës dhe për sulmin. Aldrit Oshafi e ka filluar karrierën e tij si futbollist me moshat e Tomorit për të kaluar te skuadra e parë në vitin 2014. Oshafi ka luajtur më parë për disa klube të rëndësishme në vend dhe është njohës i mirë i kampionatit. Ai ka pasur eksperienca te Besa, Luftëtari dhe Teuta. Në sezonin 2023-2024 ka provuar një eksperiencë në Kosovë, ku ka luajtur për Malishevën. Nga janari i këtij viti dhe deri tani është aktivizuar me Tomorin duke u rikthyer në vendlindje.

HOXHAJ – Flamurtari kërkon të rikthejë Ardit Hoxhajn. Emri i sulmuesit vlonjat u përfol në Vlorë edhe sezonin e shkuar, por nuk u arrit të realizohej dhe 29-vjeçari zgjodhi Elbasanin. Hoxhaj pëlqehet nga vetë administratori Sinan Idrizi. Ai është një lojtar me eksperiencë, pasi ka luajtur në shumë skuadra. E ka nisur në akademinë vlonjate dhe kontributin e tij e ka dhënë edhe në ekipe të tjera si Bylis, Skënderbeu, Korabi, Luftëtari, Ferizaj në Kosovë, Vllaznia dhe Elbasani. Me këtë të fundit u shpall kampion i Kategorisë së Parë dhe skuadra u ngjit në Superiore. Vlonjatët shpresojnë dhe besojnë se kësaj here do të arrihet që Hoxhaj të rikthehet në shtëpi. Nëse kjo do të ndodhte, do të ishte hera e katërt që ai kthehet te kuqezinjtë. 2019-2020 është sezoni i fundit që Hoxhaj luajti me Flamurtarin.

RINOVIMET – Fjoralb Deliaj ka qenë lojtari i parë që klubi ka kontaktuar për të rinovuar. Mësohet se dje, Deliaj është kontaktuar nga Artim Pollozhani që i ka konfirmuar se është në planet e klubit. Fabjan Beqja është një tjetër lojtar, të cilit i është ofruar rinovimi. Drejtuesit duket se janë të kënaqur me punën që Beqja ka bërë sezonin e shkuar dhe kanë vendosur që ta vazhdojnë bashkëpunimin. Rinovimi i kontratës është mbyllur me Fabio Hasën. 27-vjeçari nga Tirana do të vijojë në Vlorë të japë kontributin e tij sezonin që vjen për ngjitjen në elitë dhe dje klubi ka bërë zyrtare rinovimin e kontratës.

ERMAL SIKA- PANORAMASPORT.AL

NDIQE LIVE "PANORAMA TV"

---