Ishin pjesë e skuadrës së Federik Veselit, zbulohet “baza” e radhës e futbollistëve-bastexhinj në Itali
Skandali i futbollistëve-bastexhinj në Itali vazhdon të zgjerohet dhe sigurisht, nuk janë vetëm ata të Serisë A të përfshirë. Mediat italiane kanë bërë të ditur se policia ka zbuluar një tjetër ”bazë” lojtarësh që vinin baste për ndeshjet e futbollit online, pasi të gjithë kishin qenë vitin e kaluar pjesë e të njëjtit klub.
Gazeta “Il Matino: ka bërë të ditur se Guardia Di Finanza ka kontrolluar një ditë më parë shtëpinë e futbollistit të Beneventos, Kristian Pastina, duke i sekuestruar disa pajisje elektronike. Futbollisti, para hetuesve ka deklaruar se në fakt bastet i vendoste Gaetano Leticia, tani në huazim te Feralpisalo.
Përveç tyre janë të hetuar edhe sulmuesit Masimo Koda dhe Françesko Forte, aktualisht pjesë përkatësisht e Kremonezes dhe Kozencës.
Ngjarjet për të cilat të gjithë janë në hetim, i përkasin sezonit të kaluar, ku të gjithë ishin pjesë e Beneventos, klub i cili pavarësisht pritshmërive të mëdha, përfundoi nga pretendent për ngjitjen në Serinë A, në rënien në Serinë C. Pjesë e kësaj skuadre në sezonin e kaluar ishte edhe mbrojtësi i kombëtares, Frederik Veseli, ndërsa trajner i ekipit në pjesën e parë të sezonit ishte ish-fituesi i “Topit të Artë”, Fabio Kanavaro.
Mbrojtësi shqiptar u largua nga klubi italian pas rënies në Serinë C, teksa tani është pjesë e Fatih Karagumruk në Turqi.
PANORAMASPORT.AL
NDIQE LIVE "PANORAMA TV"![](https://www.panorama.com.al/sport/wp-content/static/klikoperkepanoramaonline.jpg)