Mançester Junajtid bëhet gati të shesë 7 yje për revolucionin
Mançester Junajtid thuhet se është i gatshëm të shesë shtatë lojtarë këtë verë për të ndihmuar në mbledhjen e fondeve për nënshkrime të mëtejshme përpara fundit të merkatos së verës.
Skuadra e Erik ten Hagut ka shpenzuar tashmë 88 milionë paund këtë verë për transferimet e Joshua Zirkze dhe Leni Joro. Shpenzimet e mëdha mund të mos kenë përfunduar ende, me lojtarë si Manuel Ugarte, Matajs de Ligt dhe Nuser Mazraui të lidhur me një lëvizje në “Old Trafford”. Shitja e Mejzon Grinudit për 26 milionë paund në Marsejë ka shtuar fondet, por një raport nga “ESPN” ka përmendur shtatë lojtarë që Junajtid do të ishte i gatshëm t’i shiste këtë verë.
Ish-kapiteni Herri Meguajër, Skot MekTominej, Antoni dhe Xhejdën Sanço thuhet se do të jenë të disponueshëm të largohen nëse vlerësimet e klubit përmbushen. Viktor Lindelof, Aron Uan-Bisaka dhe Kristian Eriksen kanë të gjithë një vit të mbetur në kontratat e tyre, kështu që janë gjithashtu potencialisht në listë për një largim të mundshëm. Sanço është integruar në skuadër pas përplasjes së tij publike me trajnerin Ten Hag, ndërsa startoi miqësoren para-sezonale kundër Rejnxhërs të shtunën dhe është përfshirë në turneun e tyre në Shtetet e Bashkuara.
Megjithatë, ESPN ka raportuar se Sanço i është ofruar PSG-së mes klubeve të tjera, ndërsa “L’Equipe” pretendon se marrëveshja personale mes sulmuesit anësor dhe gjigantëve francezë pothuajse është arritur. Antoni ka vuajtur që nga transferimi i tij prej 85 milionë paundësh në “Old Trafford” në vitin 2022, dhe pavarësisht pasigurisë për të ardhmen e tij, agjenti i tij Zhunior Pedrozo, tha se sulmuesi anësor ka në plan të qëndrojë në “Old Trafford”.
Junajtid, tashmë ka refuzuar një ofertë për MekTominejn nga Fulhami, për të cilën “Mail Sport” raporton të ketë qenë më pak se 30 milionë paund. Ndërkohë, Uest Hemi mendohet se po peshon një ofertë për UanBisakën diku te 15 milionë paundët. Presidenti i nderit të Bajernit, Uli Hënes konfirmoi se De Ligt mund të largohet nga klubi mes interes it të fortë të “djajve”.
Ai tha: “Është e mundur që një mbrojtës të largohet ende. De Ligt është holandez, trajneri i Mançester Junajtid është holandez. Unë nuk do të kisha asnjë problem nëse ai qëndron”. Junajtid tashmë ka rënë dakord për kushtet personale me De Ligtin, ndërsa anglezët po punojnë me Bajernin për të rënë dakord për një çmim. Ndërsa Ugarte ndërkohë mund të forcojë “djajtë” në zonën e mesfushës defensive, mes pasigurive që rrethojnë gjithashtu të ardhmen e Kasemiros.
Përgatiti: ANDROKLI DRALO – PANORAMASPORT.AL
NDIQE LIVE "PANORAMA TV"![](https://www.panorama.com.al/sport/wp-content/static/klikoperkepanoramaonline.jpg)