Kevin De Bryjne raportohet se ka arritur marrëveshjen personale për t’u bashkuar me skuadrën e Ligës Pro Saudite, Al-Itihad. Pasi ka kaluar gati një dekadë në “Etihad”, marrëveshja aktuale e mesfushorit belg me klubin do të përfundojë në fund të sezonit 2024-2025.

“Mail Sport” raportoi në shkurt se De Bryjne ishte përcaktuar si objektivi kryesor për Ligën Pro të Arabisë Saudite, me zyrtarët e përgatitur për të shtuar përpjekjet e tyre për të siguruar firmën e yllit të Pep Guardiolës këtë verë. Dhe, sipas një raporti nga gazetari Rudi Galeti, Al-Itihad ka bërë pikërisht këtë, me klubin saudit që thuhet se ka rënë dakord për kushtet personale me De Bryjnen për një transferim në këtë merkato.

Raporti vazhdon të pretendojë se negociatat thuhet se po vazhdojnë midis Al-Itihad dhe Mançester Sitit në lidhje me një tarifë transferimi për 33- vjeçarin, i cili mbërriti në Mançester nga Volfsburgu për 55 milionë paund në vitin 2015. Al-Itihad, kohët e fundit emëroi ish-mbrojtësin e Francës dhe Mançester Junajtidit, Loro Blank, si trajnerin e tyre të ri dhe krenohet me disa emra të shquar në radhët e tyre, duke përfshirë N’Golo Kantenë, Karim Benzemanë dhe Fabinjon.

Megjithatë, pavarësisht shpenzimeve të mëdha verën e kaluar, klubi në pronësi të Fondit të Investimeve Publike ishte në gjendje të renditej vetëm i pesti në kampionat, duke ardhur më shumë se 40 pikë prapa liderëve të arratisur Al-Hilalit. Kjo ndodhi pasi ata kishin fituar titullin sezonin e kaluar, ndërsa në sezonin 2023-24 ndodhi edhe divorci i klubit me Nuno Espirito Santon si trajner. Megjithatë, transferimi i De Bryjnes do të ishte një goditje e madhe për klubin, me 33-vjeçarin që ka shijuar nëntë vite mahnitëse në “Etihad”.

Në 382 paraqitje për Sitin, belgu ka shënuar 102 gola dhe ka regjistruar 170 asiste. Ai ka fituar 15 trofe me klubin. Lidhjet e tij me Lindjen e Mesme vijnë pasi De Bryjne pranoi muajin e kaluar se shumat e mëdha të parave të ofruara do ta bënin të vështirë refuzimin e një oferte tani që është në fazat e fundit të karrierës së tij.

“Kam ende një vit në kontratën time, kështu që duhet të mendoj se çfarë mund të ndodhë”, tha ai për “Het Laatste Nieuws”. “Djali im më i madh tani është tetë vjeç dhe ai nuk di asgjë përveç Anglisë. Ai gjithashtu pyet se sa kohë do të luaj për Sitin. Sapo të vijë momenti, ne do të duhet ta trajtojmë atë në një mënyrë të caktuar. Në moshën time duhet të jesh i hapur për gjithçka. Ju po flisni për shuma të jashtëzakonshme parash në atë që mund të jetë fundi i karrierës sime. Ndonjëherë duhet të mendosh për këtë. Nëse luaj atje për dy vjet, do të jem në gjendje të fitoj një shumë të jashtëzakonshme parash. Para kësaj më është dashur të luaj futboll për 15 vjet. Mund të mos e arrij ende atë shumë”.

Përgatiti: ANDROKLI DRALO – PANORAMASPORT.AL

NDIQE LIVE "PANORAMA TV"

---