Mesfushori i Interit, Hakan Çalhanoglu: Kam gjak zikaltër, sa e prita këtë kupë
Emri i tij u brohorit me të madhe nga tifozët e pranishëm në “San Siro” si një nga idhujt e ri të tifozërisë së Interit. Lojtari që ndryshoi rol dhe rezultoi vendimtar në këtë titull kampion të fituar. Hakan Çalhanoglu tregon se në venat e tij rrjedh gjak zikaltër dhe se ky titull kampion ishte si një dhuratë nga Zoti.
Hakan, si ndiheni në këtë ditë të festës?
Është gjithçka shumë e bukur. Stadiumi është i mbushur plot me tifozë siç ka qenë gjithmonë. Jemi shumë të lumtur për këtë sezon fantastik.
Sa i vështirë ka qenë ndryshimi i rolit për ju?
Në aspektin psikologjik ishte shumë i vështirë, por kisha besim që mund ta bëja këtë rol. Kam punuar me sakrificë dhe falë Inzagit dhe stafit të tij që më ka përmirësuar.
Çfarë trajneri është Inzagi?
Sekreti i tij është që na trajton të gjithëve si miq. Është trajneri ynë, por është i hapur dhe flet gjithmonë. Përpara ndeshjeve është pak i stresuar, por në përgjithësi është një person i qetë dhe pozitiv.
Mendon se ky është momenti më i mirë i karrierës tuaj?
Jam dakord. Të gjithë thonë se në moshën 29-30 vjeç lojtarët kanë eksperiencën e duhur. Mendoj se ky ka qenë sezoni më i mirë i karrierës time.
Pavarësisht se kalimi nga Milani tek Interi nuk ka qenë i lehtë, ju kurrë nuk e keni tepruar…
Faleminderit. Ata që nuk më njohin nuk e dinë se si jam. Unë jam i qetë, kam respekt për disa gjëra dhe nuk ndryshojnë kurrë. Me miqësinë nuk bëhet shaka, ajo është përtej ngjyrave. Unë kam disa raporte pozitive ende dhe i respektoj ato. Nëse nga ata nuk vjen asnjë urim, për mua nuk është problem. Por kjo është histori e mbyllur. Jam i lumtur që ndodhem tek Interi.
Cili ka qenë momenti më i bukur i sezonit?
Sigurisht që ndeshja e fituar kundër Milanit. I mundëm në transfertë. Unë jam një person që besoj në Zot dhe mendoj se titulli ishte dhuratë prej tij. Mbi të gjitha fakti që e fitova në atë ndeshje të rëndësishme dhe vendimtare.
Kishit shumë besim në këtë sezon se do të shkruanit historinë e klubit.
Sigurisht që po. Objektivi ishte të fitonim patjetër titullin kampion. Ishim gati dhe kishim punuar me shumë sakrificë. Grupi i lojtarëve është i mrekullueshëm dhe jemi si një familje e madhe. Ndoshta ju e keni parë që para, gjatë dhe pas ndeshjeve buzëqeshja nuk mungon kurrë. Kjo ka qenë e rëndësishme për ecurinë tonë.
Cilat janë objektivat e Interit?
Duhet që të vazhdojmë të shkruajmë historinë ende për këto ngjyra. Është një klub i mrekullueshëm dhe thjesht sapo kemi nisur me yllin e dytë në fanellë. Duhet të vazhdojmë kështu. Unë kam 7 vite në Milano, por gjakun e kam zikaltër.
PANORAMASPORT.AL
NDIQE LIVE "PANORAMA TV"![](https://www.panorama.com.al/sport/wp-content/static/klikoperkepanoramaonline.jpg)