Rodri feston 50 ndeshje me Spanjën: Dua të fitoj Europianin
Përveçse ishte ndeshja e fundit para tifozëve spanjollë para “Euro 2024”-ës, miqësorja kundër Irlandës së Veriut (5-1) ishte i veçantë për mesfushorin e “La Roja”-s, Rodrigo Hernández (Rodri).
Mesfushori i Mançester Sitit në Premier arriti shifrën e 50 ndeshjeve me kombëtaren spanjolle. Gjatë fluturimit për në Gjermani, ai u befasua nga shokët e skuadrës, trajneri Luis de la Fuente dhe zëvendës presidenti i federatës Alehandro Mansito. Kapiteni Morata mori mikrofonin në avion për të bërë një njoftim të rëndësishëm:
“Duhet të përgëzojmë legjendarin Rodri që ka bërë 50 paraqitje për kombëtaren”, tha ai.
Para evropianit të tij të dytë, Rodri ka pritshmëri të mëdha, por është i vetëdijshëm për vështirësinë: “Ky evropian është si ai mali që kërkon të ngjitesh. Duket larg, por hap pas hapi do të ngjitemi derisa ta arrijmë në majë”, u tha ai shokëve të ekipit.
Kujtojmë se Rodri bëri debutimin e tij me kombëtaren spanjolle më 23 mars 2018 kundër Gjermanisë, vend ku do të zhvillohet dhe “Euro 2024”-a.
“Ajo ndeshje ka qenë realizimi i ëndrrës time të parë, tani po shoh për përmbushjen e të tjerave”, deklaroi Rodri.PANORAMASPORT.AL
![](https://www.panorama.com.al/sport/wp-content/static/klikoperkepanoramaonline.jpg)