Skandali me stadiumet/ Si tallen me Elbasanin, verdheblutë diskriminohen në qytetin e tyre
Ajo që ndodhi këtë javë me Elbasanin është një skandal i vërtetë. Në kufijtë e marrëzisë madje… Po, sepse skuadra e këtij qyteti, që ka edhe një nga stadiumet më të mira në Shqipëri, nuk luan dot në fushën e vet. Do të luajë në Pezë sot, pikërisht në kompleksin “Internacional” në periferi të kryeqytetit ndeshjen e vlefshme për javën e 9-të të Kategorisë së Dytë kundër Murlanit, një skuadër kjo që përfaqëson zonën e Vaut të Dejës.
Pra, Elbasani ka stadium, por nuk luan dot në qytetin e tij dhe me gjasë nuk ka asnjë shpresë të rimëkëmbet klubi që ka fituar dy herë titullin kampion në Shqipëri. Stadiumi “Elbasan Arena” u rikonstruktua me fonde të FSHF-së dhe të qeverisë shqiptare, por askush nuk iu jep një përgjigje qytetarëve të Elbasanit se përse skuadra e tyre nuk luan më në stadiumin e saj.
Në fakt, vetëm ajo e ka “të ndaluar” të zhvillojë ndeshjet në stadiumin e saj, sepse kushdo tjetër që paguan tarifën e kripur të vendosur nga federata mund të luajë kur të dojë. Një situatë e padenjë dhe për më tepër mbi kurrizin e një prej klubeve që i ka dhënë shumë futbollit shqiptar, paçka se sot përpëlitet në luftën për ekzistencë.
“MOÇALET” – Çudirat e FSHF-së nuk mbarojnë! Mjafton të shohësh se në çfarë fushash janë zhvilluar ndeshjet në disa stadiume javën e fundit për të kuptuar se nuk respektohet më asnjë rregullore dhe se gjithçka ka mbërritur në kufijtë e qesharakes. Në Gjirokastër u zhvillua të dielën Luftëtari-Flamurtari, një përballje që deri dy vite më parë ka dhënë kënaqësi për tifozët, jo vetëm të të dyja skuadrave. Sot, si për ironi të fatit, militojnë të dyja në Kategorinë e Dytë, ndërsa në përballjen e luksit për këtë nivel kampionati u detyruan të luanin në “moçal”.
Ndeshja për fat të mirë transmetohej direkt nga kanali lokal, por çfarë të shikojë në fushën e Gjirokastrës? Topi ngecte për shkak të shiut të dendur dhe sipas rregullores kjo ndeshje nuk duhej të ishte zhvilluar, mirëpo delegatët dhe arbitrat e FSHF-së nuk morën asnjë masë.
Thjesht qëndruan si spektatorë duke injoruar çdo normë sportive. Këtë nuk e bënë vetëm në Gjirokastër, por edhe në Përmet, Këlcyrë dhe Tepelenë. Fotot e fushave të këtyre stadiumeve kanë bërë xhiron e rrjeteve sociale në 48 orët e fundit. Një skandal i vërtetë!
PANORAMASPORT.AL
LEXO EDHE