Flamurtari mbetet në pritje të Xhevahir Sukajt. Shkodrani nuk ka kthyer ende përgjigje për ofertën që i është bërë. Administratori i ka kërkuar që të bëhet drejtor dhe njëherësh të luajë futboll. Klubi e ka lënë të hapur mundësinë e federimit të sulmuesit. Duke qenë se për Kategorinë e Dytë regjistrimet e lojtarëve janë të hapura, klubi po bën një tjetër sforco për ta bindur.

“Panorama Sport” mëson se drejtues të klubit kanë kontaktuar sërish sulmuesin. Nga klubi deri më tani nuk ka ende një informacion sa i përket federimit të 33-vjeçarit. Duket se pritet përgjigjja e shkodranit për të vendosur më pas se cila do të jetë e ardhmja e Sukajt.

Ndërkaq, në Vlorë mund të ketë edhe një përforcim. Ata janë në pritje të mbërritjes së një lojtari brazilian. Është Oliviera që po bëhet “shkes” për t’i mbushur mendjen një bashkëkombësi. Drejtuesit nuk preferojnë që të zbulojë shumë të dhëna rreth këtij afrimi, por aktualisht po punohet për të mundësuar këtë transferim të fundit.

ERMAL SIKA – PANORAMASPORT.AL

NDIQE LIVE "PANORAMA TV"

---