Bajerni i Mynihut me hapa të sigurta drejt titullit kampion, kur kanë mbetur edhe 3 javë nga fundi i kampionatit. Kryesuesit e Bundesligës, bënë detyrën në transfertë ndaj Verder Bremen, duke triumfuar me rezultatin 1-2 falë golave të Gnabrit dhe Sanesë, në duelin e zhvilluar në “Weserstadion”. 

Vendësit mundën të rezistonin pa pësuar deri në minutën e 62-të, kur Gnabri përfitoi nga një pasiguri e mbrojtjes, duke e dërguar topin në rrjetë nga një distancë e afërt. Pa u mbushur 10 minuta nga zhbllokimi i rezultatit, Sane i shërbyer me zgjuarsi nga Mazraoui e dërgoi topin në rrjetë, duke mbyllur përfundimisht ndeshjen.

Në të 86-tën, ishte futbollisti vendas, Niklas Shmidt, që “shpik” një gol fantastik nga distanca, duke ngushtuar diferencën në 1-2, por vetëm kaq. 

Me këtë sukses, Bajerni ka thelluar përkohësisht diferencën në +4 nga Dortmundi, që ka një duel më pak dhe do të ndeshet me Volfsburgun, ditën e nesërme.  

PANORAMASPORT.AL

NDIQE LIVE "PANORAMA TV"

---