Vllaznia në Reikjavik me ndalesa, Brdariç e ka gati formacionin
Vllaznia ka mbyllur dje përgatitjet në Shkodër për ndeshjen e parë të turit të parë të Ligës së Konferencës, takim të cilin do ta luajnë nesër në Islandë kundër Valurit.
Delegacioni shkodran, futbollistë, staf, drejtues dhe shoqërues të tjerë që i janë bashkangjitur kuqebluve në këtë udhëtim të largët, pasditen e djeshme kanë marrë rrugën drejt Islandës. Me një ndalesë në Vjenë dhe më pas drejt Rejkjavikut, aty ku mbrëmjen e së enjtes kuqeblutë do të ndeshen me skuadrën vendëse Valur. Paraditen e djeshme kuqeblutë janë stërvitur në stadiumin “Loro Boriçi”, seanca e fundit stërvitore në vend dhe sot do të kryejnë një tjetër seancë në Reikjavik. Seanca e djeshme ka qenë me doza më të ulëta kjo, pasi ekipi do të ndërmerrte edhe udhëtimin disi sfilitës drejt vendit ishullor. Ekipi dhe delegacioni i gjerë, rreth orës 14:00 ka lënë qytetin e Shkodrës për t’iu drejtuar aeroportit të Rinasit. Më pas kuqeblutë do të kenë një ndalesë në Vjenë, nga ku do të marrin një avion tjetër për në Reikjavik.
FORMACIONI- Në aspektin sportiv, stafi teknik me në krye trajnerin Tomas Brdariç e ka gjithçka gati për këtë takim. Me përjashtime të vogla, ku në ndonjë repart mund të ketë ndonjë mëdyshje deri në momentet e fundit. Pjesa kryesore e formacionit tashmë duket se është fiksuar për ndeshjen e parë që do të luhet të enjten në Reikjavik. I vetmi shqetësim për teknikun gjerman është mungesa e sulmuesit Ildi Gruda, i cili për arsye dëmtimi nuk do të jetë i gatshëm për këtë ndeshje. Pjesa tjetër është e tëra në gjendje optimale. Pavarësisht se mund të ketë ndonjë lëvizje të minutave të fundit, mësohet se trajneri ka bërë përzgjedhjen më të mirë të mundshme për titullarët e kësaj sfide.
Qarri do të jetë në mbrojtje të katërkëndorit. Ndërsa mbrojtja do të përbëhet nga Gurishta, Stojanoviç, Juriç e Bajrami. Në mesin e fushës do të jetë treshja Krymi, Qato e Deliu. Kahrimanoviç pritet që të jetë pas dyshes Mala e Balaj që të tre do të bëjnë treshen e sulmit. Mesa duket me një rreshtim 4- 3-1-2 trajneri Brdariç do të kërkoj që të bëj më të mirën në takimin e parë të Ligës së Konferencës në Islandë. Edhe pse pritet të jetë një ndeshje e vështirë, kjo edhe për faktin se skuadra islandeze është në mes të kampionatit duke pasur një formë optimale, në kampin kuqeblu ka optimizëm për marrjen e një rezultati pozitiv në ndeshjen e parë, për t’i paraprirë një kualifikimi të mundshëm në ndeshjen e kthimit që luhet me datë 18 korrik në stadiumin “Loro Boriçi”. Tani mbetet që të shikohet ajo që djemtë e teknikut Brdariç do të tregojnë në fushën e lojës.
ADMIR URUÇI-PANORAMASPORT.AL
NDIQE LIVE "PANORAMA TV"![](https://www.panorama.com.al/sport/wp-content/static/klikoperkepanoramaonline.jpg)