Xhino Sejdo, ish-portieri i Tiranës vendos të bëhet këngëtar
Një problem shëndetësor ia ndali hovin të vazhdonte rrugëtimin e tij në fushën e blertë, kështu ai vendosi të provonte veten në botën e artit, saktësisht në muzikë. E kemi fjalën për ish-portierin e bardhebluve dhe të kuqve, Xhino Sejdo. Vetëm pak ditë më parë, 24-vjeçari ka lancuar këngën “Se S’bone” në bashkëpunim me këngëtarin Skerdi.
Në një prononcim për gazetën, ish-futbollisti i kryeqytetasve rrëfen aventurën e re në fushën e muzikës dhe shkëputjen nga futbolli…
Xhino, keni lançuar një këngë së fundmi?
Po, para pak ditësh është publikuar edhe në “Youtube”. Është një bashkëpunim me shokun tim Skerdin, i cili ka bërë hitin “Marley”.
Përse zgjodhët t’i futeshit botës së muzikës?
Ndodhi aksidentalisht. Shoku im Skerdi mendoi që të bënim një bashkëpunim krejt rastësisht, pasi po bisedonim rreth muzikës dhe, pas pak kohësh, e realizuam.
Pasion apo keni plane të tjera…
Edhe pasion, por tashmë me të vërtetë i jemi futur punës seriozisht për të sjellë edhe projekte të tjera. Po investohet për më shumë…
Përse e latë futbollin?
Isha i detyruar për shkak të një problemi shëndetësor, që në gjuhën e mjekësisë quhet “hernie inguinale”. Kjo ka qenë edhe arsyeja e vetme që më ka penguar ta vazhdoj.
Nuk kishte zgjidhje?
Jam operuar 18 vjeç dhe një vit më parë m’u komplikuan dhimbjet. Kështu, vendosa që të mos rrezikoja shëndetin dhe u shkëputa përfundimisht nga futbolli, pasi dhimbjet dolën jashtë çdo parashikimi.
Sa vite bëtë që jeni shkëputur?
Një vit.
Por kjo nuk ju ndalon të luani kalçeto?
Po, më ndalon. Por jo palestrën, duke qenë i kujdesshëm gjithmonë.
Aktualisht me çfarë po merreni?
Momentalisht jam në studio, sepse jemi duke punuar së bashku me kolegun tim.
Është e vërtetë që jeni marrë më parë me balet?
Jo, asnjëherë. Kam marrë ftesë nga “Dancing With The Stars 1”, në periudhën kur u ktheva nga Italia, por nuk shkova.
Intervistoi: Eva Marku
