Gerhard Progni do të jetë largimi i radhës nga Partizani dhe përforcimi i fundit i Teutës në merkaton e verës. Duket si një lëvizje e befasishme dhe e papritur, por kjo zhvendosje e lojtarit pritet që të zyrtarizohet sot.

Mund të duket e çuditshme për dashamirësit e kuq, pasi Partizani po vuan në fazën sulmuese dhe në fund të merkatos gjen kurajën të largojë edhe golashënuesin më të mirë të edicionit të fundit, ku Progni shënoi 8 gola, madje njërin prej tyre ia realizoi ish-skuadrës nga erdhi në qershor të 2017- ës, Teutës, në sfidën e 4 marsit.

Dy ndeshjet e para të këtij edicioni dhanë sinjalin se Progni nuk do ta kishte statusin e të pazëvendësueshmit, ndaj palët kanë pranuar paktin që lojtari të gjejë një klub tjetër. Partizani i këtij sezoni ka vendosur të bazohet te lojtarët me moshë të re dhe promovimi i tyre, ndaj largimi i Prognit lidhet edhe me këtë fakt. Pra, më shumë se dëshirë e lojtarit, largimi nga Partizani shikohet si një politikë e vetë drejtuesve të klubit ndaj Prognit që nxorën jashtë planeve.

SI NDRYSHON TEUTA

Me afrimin e Gerhard Prognit, Teuta blindon repartin e sulmit. Tani trajneri Bledi Shkëmbi ka një zgjedhje më shumë dhe për më tepër ka në dispozicion një lojtar që e njeh mjaft mirë, pasi dikur kanë qenë shokë skuadre te Skënderbeu, ku kanë fituar trofe të rëndësishëm. Me afrimin e tij, korçari ka më shumë alternativa në sulm, pasi Progni, përveçse mund të luajë në krahun e djathtë, mund të aktivizohet edhe në majën e sulmit si te Partizani.

Teuta ka Latif si sulmuesin kryesor, por afrimi i tij rrit më tepër konkurrencën dhe ofron më shumë opsione për stafin teknik. Në dy ndeshjet e para “djemtë e detit”  kanë hasur probleme në majën e sulmit dhe ndoshta Progni mund të jetë zgjidhja e tyre. Afrimi i tij ka entuziazmuar së tepërmi tifozët durrsakë, teksa me këtë “goditje”, Teuta konfirmon se në këtë sezon edhe titulli nuk është i pamundur, edhe pse jemi vetëm në javën e tretë të kampionatit dhe gara është e gjatë dhe me të papritura.

31-vjeçari vendosi të rikthehet në Durrës, aty ku ka kaluar gjashtë muaj mjaft të mirë në karrierën e tij dhe fakti që do të punojë me Shkëmbin dhe do të këtë shok skuadre lojtarë si: Osmani, Bicaj apo Hidi, bëri që ai ta pranonte menjëherë propozimin e bregdetarëve. Me afrimin e tij, Shkëmbi mund të luajë sërish me të njëjtën skemë 4-2-3-1, por Traore rrezikon të humbasë vendin e titullarit. Gjithsesi, është trajneri ai që do të vendosë se kush luan dhe këtë do ta tregojë fusha.

DRILON XHEPOLLARI

 

 

NDIQE LIVE "PANORAMA TV"

---