Kryeministri Edi Rama thotë se ka qenë ai dhe PS që kanë bërë reformën në drejtësi. Ai u shpreh se “Amerika ka sjellë Noc Rrokun”.
Kreu i qeverisë u shpreh se evropianët dhe amerikanët kanë pasur shumë rezerve për reformën në drejtësi, ndërsa theksoi se askush nuk ka patur vullnetin e tij.
Rama theksoi se ka qenë ëndrra e tij që reforma në drejtësi të godasë majtas dhe djathtas.
Sipas tij, SHBA dhe BE kane dhene kontributin e tyre ne reforme, por nuk mund te behej pa vullnetin e Partise Socialiste.
“Amerikanët kanë sjellë Noc Rrokun këtu, sepse këtë e ka sjellë PS me mua në krye. Që të jemi të qartë edhe amerikanët edhe evropianet kanë pasur shumë rezerva, ishin shumë mosbesues. Mbështetja për amerikane ka qenë absolute, por askush nuk e ka pasur vullnetin tim për ta ndarë drejtësinë nga pushteti politik. Për herë të parë në historinë e Shqipërisë nuk ka ndodhur që të merren të pandehur, ministra, deputetë e kryetar bashkish. Kjo ka qenë ajo që unë kam ëndërruar, që të godasë majtas e djathtas”, tha Rama në Opinion.
Më tej kryeministri tha: Po përsëris që ajo që ka bërë Partia Socialiste nën udhëheqjen time është epokale. Është e para forcë politike në historinë e këtij vendi që ka marrë një vendim dhe ka shprehur vullnetin më të plotë që të tërheqë fuqinë e vet nga territori i drejtësisë. Dhe me kosto patjetër që ajo drejtësi e çliruar nga pushteti politik do të godasë edhe brenda nesh. Dhe një kosto jo e paftuar, por një kosto e mirëseardhur për mua. Sepse nga pikëpamja organizative, nga pikëpamja administrative, ti mund të bësh gjithçka, por kur vjen puna te gjykimi për vepra penale nuk e bën dot këtë. Për këtë duhet drejtësia, duhet prokuroria, duhet gjykata.
NDIQE LIVE "PANORAMA TV" © Panorama.al
