Problemet e qeverisë italiane me Evropën për shkak të protokollit të nënshkruar ndërmjet Italisë dhe Shqipërisë për menaxhimin e emigrantëve, i shtohen edhe ato gjyqësore.
Sipas mediave italiane, sipërmarrësi italian Francesco Becchetti, ish-pronar i platformës televizive italo-shqiptare Agon, ka njoftuar një vendim sekuestrimi për kryeministrinë dhe të gjitha ministritë të qeverisë italiane për 135 milionë euro.
Nëpërmjet avokatëve të tij, Becchetti kërkoi sekuestrimin e të gjitha shumave “deri në afërsisht 135 milionë euro”, të cilat qeveria ka marrë përsipër t’i paguajë Shqipërisë në bazë të protokollit të 6 nëntorit 2023.
Sipërmarrësi, pretendon të drejtën atyre parave në bazë të Arbitrazhit që dënoi Shqipërinë duke kërkuar kompensimin e dëmeve për mbylljen e televizionit.
“Çmimi – thotë Becchetti – është përfundimtar, detyrues, ekzekutiv dhe ka të njëjtin efektivitet si një dënim përfundimtar i dhënë brenda shtetit. Megjithatë, në 4 vitet e fundit, qeveria Rama ka refuzuar të zbatojë dispozitat e vendimit të Gjykatës së ICSID të Bankës Botërore, të krijuar nga Konventa e Uashingtonit e vitit 1965”, shkruan biznesmeni cituar nga “La Stampa”.
Në vitin 2019, Gjykata Ndërkombëtare e Arbitrazhit e shpalli Shqipërinë përgjegjëse për shpronësimin e paligjshëm të Agonset-it në kundërshtim me marrëveshjen dypalëshe të investimit ndërmjet Italisë dhe Shqipërisë dhe dënoi Tiranën të dëmshpërblejë Becchettin dhe subjektet e tjera me mbi 120 milionë euro përfshirë dëmet, kostot dhe interesa të maturuara.
Ndërsa Shqipëria e kundërshton vendimin prej 4 vitesh, avokatët thonë se qeveria ka “përshkallëzuar përndjekjen ndaj Becchettit në shkelje të rëndë dhe të përsëritur të detyrimeve ndërkombëtare të përcaktuara nga Konventa ICSID dhe traktatet ndërkombëtare të të drejtave të njeriut”.
NDIQE LIVE "PANORAMA TV" © Panorama.al
