Koordinatorja e Partisë Demokratike për Diasporën, Jozefina Topalli, ka përkujtuar sot ditën Ndërkombëtare të Emigrantëve, që shënohet më 18 Dhjetor.
Në një deklaratë, ajo e cilësoi këtë ditë si një moment reflektimi, kujtese dhe nderimi për të gjithë ata që kanë braktisur gjithçka në atdhe, për të kërkuar një jetë më të mirë në vendet e huaja.
“Shqiptarët e dinë më mirë se kushdo se ç’do të thotë të jesh emigrant”, shkruan ajo në një psotim në rrjetet sociale.
Ndër të tjera ajo tha se emigrimi ka qenë shpesh një rrugë shpëtimi, por gjithashtu një histori e mbushur me sakrifica të jashtëzakonshme, lotë dhe vuajtje.
“Kjo ditë është një thirrje për të mos harruar rrugën e vështirë që kanë kaluar mijëra shqiptarë. Një thirrje për të nderuar sakrificat e tyre dhe për të mos harruar kurrë rrënjët tona, kulturën tonë dhe ëndrrën për një Shqipëri më të mirë,” tha ajo.
Jozefina Topalli: 18 Dhjetor-Dita Ndërkombëtare e Emigrantëve. Sot është dita e kujtesës, e reflektimit dhe e nderimit për të gjithë ata që kanë braktisur gjithçka për të ndjekur një jetë më të mirë në një tokë të huaj. Shqiptarët e dinë më mirë se kushdo se ç’do të thotë të jesh emigrant.
Emigrimi për ne ka qenë shpesh një rrugë shpëtimi, por njëkohësisht edhe një histori lotësh, ndarje familjare dhe vuajtjesh. Nga skafet nëpër Adriatik deri tek endjet e gjata në Europë e botë, kemi përjetuar humbje, zhgënjime dhe sfida të jashtëzakonshme. Por pavarësisht gjithçkaje, shqiptarët kudo që ndodhen kanë treguar forcë, guxim dhe përkushtim për të ndërtuar jetë më të mira për familjet e tyre.
Kjo ditë është një thirrje për të mos harruar rrugën e vështirë që kanë kaluar mijëra shqiptarë. Një thirrje për të nderuar sakrificat e tyre dhe për të mos harruar kurrë rrënjët tona, kulturën tonë dhe ëndrrën për një Shqipëri më të mirë.
Për të gjithë shqiptarët kudo në botë: Ju jeni drita dhe fuqia jonë!
NDIQE LIVE "PANORAMA TV" © Panorama.al
