Nëse flasim për një futbollist në formë te kuqezinjtë, padyshim që mendja na shkon tek Ernest Muçi. Pavarësisht asaj që ka bërë ndeshjet e fundit me klubin e tij, në Kombëtare gjërat janë ndryshe.
Silvinjo sërish po e projekton për ta aktivizuar si zëvendësues. Gjithmonë nëse Ernest Muçi nuk ka asgjë shqetësuese, pasi stërvitjen e djeshme është detyruar ta ndërpresë. Për një moment gjatë testit brenda grupit u krijua panik në lidhje me rrëzimin e fantazistit.
Pasi mori një top dhe dribloi 2-3 lojtarë, Muçi goditi fort me të djathtën, por nuk arriti që të vendoste këmbën mbështetëse në tokë dhe u rrëzua direkt. Ai qëndroi shtrirë dhe stafi mjekësor dhe Silvinjo që ishte aty afër vrapuan drejt tij dhe të gjithë shokët u mblodhën për të kuptuar situatën.
Pas disa sekondash, Muçi çohet dhe fillon të ecë, por e kuptoi se nuk mund të vazhdonte dhe e ndërpreu stërvitjen. Stafi mjekësor do të bëjë vlerësimet e duhura dhe do të shihet nëse 23-vjeçari do të stërvitet sot me ekipin. Shpresojmë që të mos ketë asgjë serioze dhe të jetë gati për Çekinë.
KRISTI SEJATLLARI-PANORAMASPORT.AL
NDIQE LIVE "PANORAMA TV" © Panorama.al
