Policia argjentinase, e cila po heton vdekjen e yllit të “One Direction”, Liam Payne, ka bastisur shtëpitë e dy punonjësve të hotelit ku ai vdiq dhe të një miku të tij.
Sipas TMZ, bastisjet kanë ndodhur mbrëmjen e së martës, ndërsa janë kontrolluar edhe dollapët e punonjësve në hotelin ku humbi jetën 31-vjeçari.
Policia beson se stafi kishte qenë në kontakt me Liam Payne përpara se ai të rrëzohej nga ballkoni i katit të tretë në hotelin CasaSur Palermo para rreth tre javësh tashmë.
Siç raportojnë mediat e huaj, miku i tij ka hyrë në hetimet e autoriteteve, pasi në celularin e Liam Payne janë gjetur mesazhe, ku ai i kërkon drogë. Megjithatë, ai nuk ishte në shtëpi kur ndodhi bastisja, ndaj policia ende nuk ka kontaktuar me të.
Po ashtu raportohet se policia ishte informuar se stafi i hotelit i kishte shitur drogë Liam Payne-it vetëm pak orë para vdekjes së tij.
Ndërkohë, sipas BBC, trupi i yllit të popit iu dha familjes së tij të mërkurën për t’u kthyer me avion në Mbretërinë e Bashkuar.
Trupi i tij ishte mbajtur në Argjentinë ndërsa autoritetet lokale përfunduan testet e mëtejshme toksikologjike dhe laboratorike.
Autopsia konfirmoi se 31-vjeçari kishte pësuar gjakderdhje të brendshme dhe të jashtme dhe lëndime të shumta, të marra si pasojë e rënies.
NDIQE LIVE "PANORAMA TV" © Panorama.al
