Ish-ambasadori i Shqipërisë në Britani, Mal Berisha, ka komentuar situatën e tensionuar në Lindjen e Mesme, duke u fokusuar në përplasjet e fundit mes Izraelit dhe Iranit.
I ftuar në studion e “Open” në News24, Berisha nënvizoi se Libani ka pasur probleme me Hezbollahun dhe se është një vend me një diversitet të madh fetar.
Sipas tij, sulmi i vitit të kaluar në Izrael, si dhe marrja e pengjeve, ka nxitur grupet më të rrezikshme palestineze dhe i ka dhuruar Izraelit mundësinë për të realizuar një projekt për marrjen e Gazës dhe Bregut Perëndimor.
“Mendoj se u gjet një shkëndijë te rrëmbimi i personave të pafajshëm,” tha Berisha. “Përgjigja e Izraelit ishte e pamëshirshme dhe disproporcionale, duke mos bërë dallim mes civilëve të pafajshëm dhe terroristëve.”
Ai theksoi se asnjëra palë nuk do të guxonte të bënte gabimin e madh të sulmit të drejtpërdrejtë, ndërsa përmendi gjithashtu shqetësimet lidhur me sulmet ndaj reaktorëve bërthamorë, duke theksuar se këto do të kishin një ndikim rajonal të madh.
NDIQE LIVE "PANORAMA TV" © Panorama.al
