Motorët ishin një pasion i madh për aktorin e humorit Gazmend Paja. Aktori kishte treguar se e kishte zgjedhur motorin për të lëvizur nëpër Tiranë dhe shihej thuajse kudo duke i dhënë atij. Por, duket se diçka ka ndodhur me dashurinë e tij për të dhe e gjitha e ka zanafillën 10 muaj më parë.
Komediani vitin e kaluar u aksidentua në kryeqytet teksa lëvizte me motor. Ai u përplas nga një makinë në rrugën e Kavajës. Aktori i njohur u dërgua në spital për të marrë ndihmën e parë, por fatmirësisht nuk pati asnjë dëmtim serioz.
Megjithatë, tronditja dhe trauma duket se nuk ka kaluar. Thënë kjo, Gazi është fotografuar së fundmi në Tiranë duke lëvizur me një…scooter. Paparaci i “Panorama Plus” ka fotografuar aktorin në një ditë të zakonshme teksa lëviz me këtë mjet kaq popullor së fundmi, që po përdoret gjithnjë e më shumë. Duke qëndruar sportiv, Gazi shihet i veshur me një palë pantallona gri dhe një kanotiere të bardhë.
Për të shmangur diellin mban një kapele ushtarake, ndërsa për t’iu larguar zhurmës së metropolit kufje. Me sa duket, pas aksidentit aktori ka vendosur të mënjanohet paksa nga motorët. Pas pushimeve me familjen, tani është koha për t’u rikthyer në punë. Nëse s’ka ndonjë lëvizje surprizë, Gazi do rinisë sezonin e ri në “Portokalli”, ku ka qenë prej vitesh, krah projekteve të tjera individuale.
Kujtojmë se aktori dhe bashkëshortja e tij janë prindër të një djali të quajtur Dard. Aktori i njohur i spektaklit të humorit ‘Portokalli’, vendosi t’i jepte fund beqarisë në moshën 41-vjeçare. Deri në atë moment, Gazi ishte munduar që lidhjen e tij ta mbante larg syrit të mediave, por kjo vajzë që ai e përkufizoi si “e bukura e dheut”, ia mori mendjen për t’u bërë gruaja e tij. Për miqtë e tij, ky ishte një lajm i madh, duke qenë se për një artist sqimatar si Gaz Paja nuk ishte e thjeshtë që të bindej për këtë hap të rëndësishëm në jetën e tij
