Kur është koha më e mirë për të pirë kafe dhe sa është e mjaftueshme? Studimet tregojnë se konsumimi i përditshëm i kafeinës mund të jetë i dobishëm për zemrën dhe trurin, ndërsa kur konsumohet me masë, dhe pa sheqer, kafeja ofron përfitime të konsiderueshme falë antioksidantëve që përmban. Megjithatë, kur pini kafe është po aq e rëndësishme sa mënyra se si e pini atë. Ekspertët sugjerojnë se koha e duhur mund t’ju ndihmojë të shmangni pasojat negative.
Koha më e mirë për të pirë kafe
Kafeja përmban kafeinë, e cila është një stimulues natyral. Kjo do të thotë se mund të nxisë metabolizmin duke rritur rrahjet e zemrës dhe shpenzimin e energjisë së trupit. Kjo është arsyeja pse pirja e kafesë në mëngjes, rreth 90 minuta pas zgjimit, është ideale, pasi përputhet me ritmin natyral të kortizolit të trupit. Nëse stërviteni në mëngjes, pirja e kafesë para stërvitjes mund të përmirësojë performancën tuaj dhe të ndihmojë në djegien e yndyrës, ndërsa pirja e saj pas stërvitjes mund të ndihmojë në rikuperimin e muskujve.
Megjithatë, është më mirë të mos pini kafe me stomakun bosh menjëherë pasi të zgjoheni, pasi kjo mund të shkaktojë prodhimin e acidit në stomak, duke krijuar siklet. Prandaj, pini kafe pas një vakti ose meze të lehtë, kjo gjithashtu zvogëlon rrezikun e rritjes së niveleve të kortizolit, të cilat tashmë janë të larta në orët e para pas zgjimit.
Kafeja pasdite nuk duhet të jetë vonë
Pas drekës, nivelet e energjisë mund të ulen dhe një kafe mund t’ju japë shtytjen që ju nevojitet. Një kafe në orët e hershme të pasdites është më efektive se sa një më vonë gjatë ditës, pasi nivelet e kortizolit ulen natyrshëm pasdite. Kafeina në kafe mund të rrisë vigjilencën dhe t’ju japë energjinë që ju nevojitet.
Megjithatë, për shkak se kafeina rrit vigjilencën, është më mirë të shmangni kafenë pas orës 16:00, kjo është veçanërisht e rëndësishme për ata që kanë probleme për të fjetur gjatë natës. Kafeja mund të prishë modelet e gjumit, pasi kafeina mund të qëndrojë në trup për rreth tetë orë dhe të jetë ende aktive para gjumit.
Sa kafe është shumë?
Por cila është sasia e duhur e kafesë që duhet të konsumojmë? Kafeja vepron si diuretik dhe tenton të dehidratojë trupin. Prandaj, nëse pini shumë kafe, mund të dehidratoheni dhe të keni nevojë të shkoni shpesh në tualet. Për ta luftuar këtë, përqendrohuni te uji i pijshëm që është filtruar dhe fortifikuar me minerale, të cilat ndihmojnë në rimbushjen e lëndëve ushqyese. Shumë kafeinë gjithashtu mund të rrisë nivelet e estrogjenit, gjë që mund të çojë në shtim në peshë, kështu që është e rëndësishme të shikoni se sa kafe konsumoni. Përpiquni të kufizoni marrjen e kafeinës në jo më shumë se 500 mg në ditë (pra jo më shumë se katër kafe) për të shmangur efektet e mundshme negative të dehidrimit, por edhe për të përfituar nga përfitimet e tij.
NDIQE LIVE "PANORAMA TV" © Panoramaplus.al