Sëmundja që e bëri të braktiste futbollin dhe pengjet në karrierë. Lorik Cana tregon për “L’Equipe” vendimin e tij për t’u larguar dhe kujton faktin që nuk fitoi dot një trofe me Marsejën. “Ka 15, 16 muaj që e kam mbyllur me futbollin, praktikisht sapo përfunduam rrugëtimin europian me Shqipërinë. Praktikimi i futbollit në nivele kaq të larta ishte kthyer në një profesion të rrezikshëm për mua. Kisha disa probleme shëndetësore, të cilat nuk po i kapërceja dot me kalimin e kohës. Përpara dhe pas Europianit në Francë, kam kryer disa analiza specifike, të cilat treguan se nuk isha edhe aq mirë.
Vuaj nga një sëmundje që quhet miokardi. Është në vijimësi të një virusi të marrë më parë. Kam pasur ethe të forta dhe jam sfilitur nga sëmundja për sa i përket anës fizike. Virusi ka prekur miokardin dhe më ka provokuar një skuqje. Pas kontrolleve të specializuara, arrita të diagnostikohesha. Pas një kontrolli të mjeku panë se gjendja ishte më serioze nga ajo që mendohej. Edhe pse u ndieva mirë, unë u ndoqa cdo tre muaj dhe mjeku nuk mund të më jeptë siguri që unë mund të rifitoja aftësinë time fizike të mëparshme”, tregon Cana.
“Gjendja shëndetësore mbeti konfidenciale dhe i lejoi atij që të ishte pjesë e ndeshjeve të Europianit. Miokarditi vazhdoi të avanconte dhe kardiologu e bindi Canën se të vazhdonte të luante, mund ta çonte në komplikime shumë serioze”, shkruan gazeta franceze.
Ai flet gjithashtu edhe për pengjet në karrierë. “Më erdhi keq që nuk fitova diçka në Francë me Marsejën. Humbëm dy finale në Kupë dhe në vitin 2009 dolëm në vendin e dytë në kampionat pas Bordosë. Ishte diçka shumë negative. Deshamp erdhi një vit më vonë dhe tha se më donte në skuadër, por unë doja të largohesha”, përfundoi Cana.
NDIQE LIVE "PANORAMA TV" © Panoramaplus.al