Mahmood për herë të parë në Shqipëri, zbulohet çfarë ka përgatitur për skenën e Festivalit të Këngës

Këtë vit, Festivali i Këngës në RTSH ka rezervuar surpriza të shumta për ndjekësit e tij të rregullt.

Producentet e këtij edicioni, Vera Grabocka dhe Alketa Vejsiu, që po merren me organizimin e gjithë festivalit, kanë premtuar se do ta shndërrojnë në një spektakël të vërtetë dhe siç duket, kështu do të ndodhë.

Pak ditë më parë u zbulua se Giusy Ferreri, Mahmood dhe Eleni Foureira do të jenë disa nga të ftuarit specialë të Festivalit të 58-të të Këngës.

Tashmë na ndajnë vetëm fare pak ditë nga festivali dhe surprizat po zbulohen pak nga pak. Sipas “RTSH.al”, fituesi i vitit të kaluar të Sanremos që përfaqësoi Italinë në Eurovision, Mahmood, do të ngjitet në skenën e Pallatit të Kongreseve ditën e enjte, 19 dhjetor.

Këngëtari i njohur do të performojë një kolazh me hitet e tij të fundit, duke përfshirë “Soldi” dhe “Barrio”. Kjo është hera e parë që Mahmood këndon në Shqipëri dhe performanca e tij do të shoqërohet me efekte speciale në skenë. Këtë vit, Festivali i Këngës me siguri do të rezultojë një sukses i vërtetë dhe prandaj duhet ta ndiqni nga afër në skenën e madhe të Pallatit të Kongreseve.

Këngëtari seksi 27-vjeçar, me emrin Alessandro Mahmoud, jeton në Milano të Italisë dhe ka marrë mjaft famë në gjininë PopR&Bhip hop. Artisti me baba nga bota arabe dhe nënë italiane u zbulua si talent në edicionin e gjashtë të versionit italian “The X Factor”.

Në vitin 2019, ai fitoi “Sanremon” me këngën “Soldi”, duke përfaqësuar Italinë në Festivalin Europian. Le të shohim se cilit këngëtar shqiptar do t’i sjellë fat…