Mick Jagger vlerëson rrokerët e rinj: Ka ende pak jetë për ‘rock and roll’

Mick Jagger ka folur për yjet e tij të preferuar të rrokut të këtij brezi. Ikona e Rolling Stones vlerësoi Machine Gun Kelly dhe Yungblud që i dhanë jetë zhanrit.

“Në muzikën rock keni nevojë për energji dhe nuk ka pasur shumë këngëtarë të rinj rock përreth. Tani janë disa”, tha legjenda e muzikës, teksa foli në radion suedeze P4.  “Ju keni Yungblud dhe Machine Gun Kelly. Kjo lloj atmosfere post-punk më bën të mendoj se ka ende pak jetë në rock and roll,” vazhdoi ai. Jagger gjithashtu mbylli çdo thashethem për pensionimin e tij.

“Nuk po planifikoj që të jetë dalja e fundit live. “Më pëlqen të jem në turne. Nuk mendoj se do ta bëja nëse nuk do të më pëlqente”, tha ai. “Më pëlqen të dal atje në skenë dhe të bëj shfaqjet e mia. Kjo është ajo që unë bëj. Unë dua që të gjithë të kënaqen dhe të harrojnë problemet në jetën e tyre për disa orë dhe thjesht të qetësohen dhe të kenë një pasdite dhe mbrëmje të mrekullueshme.”