Pasioni i fshehtë i Princeshë Dianës për kërcimin! Dokumentari i ri që zbulon marrëdhënien e veçantë me mësuesen e saj

Një dokumentar i ri po vjen për të ndriçuar një anë më pak të njohur, por thellësisht personale të Princeshës Diana, dashurinë e saj për kërcimin dhe marrëdhënien e ngushtë që ajo zhvilloi me mësuesen e saj skoceze, Anne Allan.

Ann Allan ishte mësuesja sekrete e kërcimit të Dianës për gati një dekadë, duke i ofruar asaj mësime private dhe duke vepruar si një nga miqtë e saj më të besuar. Mbi qindra mësime, Diana gjeti ngushëllim në artin e kërcimit teksa u përball me famën e saj shpërthyese, amësinë, martesën e trazuar dhe betejën me buliminë.

Dokumentari i ri, një bashkëprodhim midis Two Rivers Media dhe Sphere Media, bazohet në kujtimet e mësueses, Dancing With Diana , i cili u publikua vitin e kaluar. Filmi 90-minutësh do të fokusohet në periudhën nëntëvjeçare, duke filluar nga viti 1981, kur Allan u bë mësuesja personale e kërcimit të princeshës.

Një vështrim ndryshe nga jeta e Dianës

Teksa foli për dokumentarin, mësuesja e saj e kërcimit tha: “Jam e emocionuar që Dancing With Diana do të shfaqet në ekranin e madh. Gjatë bashkëpunimit tim me princeshën, pata fatin të njoh jo vetëm pasionin e saj për kërcimin, por edhe një anë shumë më personale të saj. Shpresoj që shikuesit të zbulojnë një këndvështrim të ri për gruan e mrekullueshme që ajo ishte.”

Dokumentari do të përfshijë pamje të papublikuara, fotografi, dhurata personale dhe shënime nga Diana dhe do të shfaqë intervista të reja nga analistë mbretërorë, të famshëm dhe njerëz të afërt me të. Nëpërmjet kujtimeve të Allan-it, shikuesit do të ndjekin transformimin e Dianës, nga një e sapomartuar e turpshme në një ikonë globale.

Kërcimi nuk ishte thjesht një hobi për Dianën, por një mënyrë për të shprehur ndjenjat e saj dhe për të fituar vetëbesim. Stërvitja e saj i dha asaj kurajon për të kërcyer Billy Joel’s Uptown Girl në Royal Opera House të Londrës së bashku me Wayne Slip, si dhe të bënte kërcimin ikonik me John Travolta në Shtëpinë e Bardhë.

Alan Clements, drejtor menaxhues dhe producent ekzekutiv i Two Rivers Media, tha: “Historia e Dianës mbetet e përjetshme dhe prekëse. Libri i Anne Allan është plot me detaje të paçmueshme, të cilat i japin një mundësi autentike dhe origjinale kësaj ndërmarrjeje.’