A keni menduar ndonjëherë se çfarë mund të jetë në furçën tuaj të dhëmbëve? Studiuesit kanë zbuluar diçka befasuese që mund të kthejë në kokë perceptimet tona për higjienën e përditshme.
Një studim i fundit nga shkencëtarët e Universitetit Northwestern zbulon se në një furçë dhëmbësh ndodhen 600 viruse, por mos u shqetësoni, pasi realiteti nuk është aq alarmues sa duket: shumica e këtyre viruseve janë më shumë të dobishme sesa të dëmshme.
Zbulimet
Udhëheqësja e studimit, mikrobiologia Erica Hartmann, thotë se ky zbulim ishte sa i papritur aq edhe mbresëlënës.
“Ka kaq shumë gjëra në botën rreth nesh që mbeten të pakuptueshme, edhe në objekte që i marrim si të mirëqena”, thekson ajo.
Hulumtimi, i botuar në revistën Frontiers in Microbiomes, është një vazhdim i punës së mëparshme të ekipit në vitin 2021, i titulluar “Operation Pottymouth”, i cili u fokusua në bakteret e gjetura në furçat e dhëmbëve.
Megjithëse më shumë se 600 viruse ndryshonin mes tyre, ekzistonte një lloj i veçantë që ishte më i zakonshmi: virusi që shkatërron mykobakteret, të cilat mund të shkaktojnë infeksione serioze si lebra dhe tuberkulozi.
“Lajmi i mirë është se këto viruse, të njohur si bakteriofagë, janë në furçën tuaj të dhëmbëve dhe kanë potencialin për të eliminuar bakteret patogjene”, thotë Hartmann.
Çfarë janë saktësisht bakteriofagët?
Gjëja më emocionuese është se këta bakteriofagë nuk janë thjesht vizitorë të pazakontë në banjën tonë. Kohët e fundit kanë gjetur aplikim në trajtimet e infeksioneve bakteriale, veçanërisht në rastet që janë rezistente ndaj antibiotikëve.
Siç thekson Hartmann, “ndoshta antibiotiku tjetër i madh vjen nga diçka që rritet në furçën tuaj të dhëmbëve”.
Megjithëse mendimi se furçat tona të dhëmbëve të përditshme mund të përmbajnë viruse të tilla nuk është i këndshëm, mundësia për të luftuar infeksionet serioze falë këtyre “armëve” të vogla është një aspekt i rëndësishëm që ia vlen të mbahet mend.
NDIQE LIVE "PANORAMA TV" © Panoramaplus.al