Parlamenti Evropian në një mbledhje në Strasburg, vendosi sot të njohë liderin e opozitës Edmundo Gonzalez Urrutia si presidentin legjitim, të zgjedhur në mënyrë demokratike të Venezuelës.
Në një rezolutë të miratuar të enjten me 309 vota pro, 201 kundër dhe 12 abstenime, Parlamenti dënoi dhe hodhi poshtë plotësisht mashtrimin zgjedhor të orkestruar nga Këshilli Kombëtar i Zgjedhjeve, i kontrolluar nga regjimi, i cili refuzoi të bënte publik rezultatin.
“Eurodeputetët njohin González Urrutia si president legjitim dhe të zgjedhur në mënyrë demokratike dhe María Corina Machado si udhëheqëse të forcave demokratike në Venezuelë”, thuhet në deklaratë.
Ata dënojnë gjithashtu urdhrin e arrestit kundër González Urrutia dhe theksojnë vendimin e Qeverisë së Spanjës për t’i dhënë atij azil politik.
Eurodeputetët theksojnë se, pavarësisht thirrjeve të vazhdueshme nga komuniteti ndërkombëtar, regjimi i Venezuelës nuk respekton Marrëveshjen e Barbadosit të vitit 2023 midis qeverisë së Nicolas Maduro dhe opozitës për organizimin e zgjedhjeve presidenciale, gjë që e bën të pamundur fitoren e zgjedhjeve.
Në tekst theksohet se raportet e misioneve ndërkombëtare të vëzhgimit të zgjedhjeve tregojnë qartë se zgjedhjet presidenciale të 28 korrikut nuk plotësuan kriteret ndërkombëtare për integritetin zgjedhor.
Pas zgjedhjeve presidenciale të korrikut në Venezuelë, Maduro u shpall fitues nga Këshilli Kombëtar Zgjedhor. Fitorja e tij u mbështet nga Gjykata e Lartë, por opozita thotë se Gonzalez Urrutia fitoi me më shumë se 60 për qind. González Urrutia, i kërcënuar me burg në vendin e tij, u nis dhjetë ditë më parë për në Spanjë, e cila i dha azil.
NDIQE LIVE "PANORAMA TV" © Panorama.al
