Lufta Ukrainë-Rusi ishte një ndër temat më të diskutuara gjatë javës së zgjedhjeve në SHBA, pasi fituesi i garës Donald Trump është shprehur se sapo të marrë drejtimin e Shtëpisë së Bardhë do t’i japë fund luftës brenda 24 orëve, sapo të bëhet zyrtarisht president.
Deklaratat e Trump rreth Ukrainës dhe e ashtuquajtura qasja e tij “Amerika e para” ndaj politikës së jashtme, kanë bërë që shumë analistë të politikës të sugjerojnë se Trump do të ketë ndikim të rëndësishëm në vijimësinë e luftës.
Por ekspertët nga Instituti për Studimin e Luftës thonë se indikacionet janë se Kremlini tani po përpiqet të diktojë kushtet e çdo negociate të mundshme “paqeje” me Ukrainën përpara se Trump të marrë zyrtarisht postin e presidentit të Shteteve të Bashkuara të Amerikës.
“Mënyra në të cilën Kremlini po përpiqet të vendosë kushtet për negociata sinjalizon fuqishëm se objektivat e Rusisë mbeten të pandryshuara,” thonë analistët e grupit, raporton Sky News.
Ndërkohë që ministri i Jashtëm rus Sergei Lavrov pohoi dje se fillimi i presidencës së Trump nuk do të ndryshojë rrënjësisht qëndrimin e SHBA-së ndaj Ukrainës.
NDIQE LIVE "PANORAMA TV" © Panorama.al
