Njerëzit që hanë shumë fibra dhe drithëra çdo ditë kanë një rrezik më të ulët të sëmundjeve të ndryshme kronike jo të transmetueshme dhe në përgjithësi janë më të shëndetshëm, sipas një studimi të ri shkencor, të kryer për llogari të Organizatës Botërore të Shëndetësisë (OBSH).
Hulumtimet tregojnë se ngrënia e të paktën 25 gram fibra dietike në ditë shoqërohet me një reduktim prej 15% deri në 30% të vdekshmërisë së parakohshme nga çdo shkak, krahasuar me ata që hanë sasi të ulëta të fibrave të tilla dietike.
Në veçanti, ngrënia e bollshme e fibrave shoqërohet me një ulje prej 16% deri në 24% të rrezikut të sëmundjeve koronare të zemrës, goditjes në tru, diabetit të tipit 2 dhe kancerit të zorrës së trashë. Gjithashtu lidhet me një peshë më të ulët trupore dhe një nivel më të ulët të kolesterolit.
Për çdo rritje prej tetë gramësh të konsumit ditor të fibrave, rreziku i sëmundjeve të zemrës, diabeti i tipit 2 dhe kanceri i zorrës së trashë reduktohet me 5% në 27%, dhe ka mbrojtje më të mirë kundër goditjes në tru dhe kancerit të gjirit.
Gjithashtu, çdo rritje prej 15 gramësh në konsumin ditor të drithërave të plota çon në një ulje prej 2% deri në 19% të vdekshmërisë së parakohshme, sëmundjeve koronare të zemrës, diabetit të tipit 2 dhe kancerit të zorrës së trashë. Drithërat integrale janë të pasura me fibra, gjë që shpjegon efektin e tyre mbrojtës.
Studiuesit, të udhëhequr nga profesori Jim Mann i Universitetit të Otagos, Zelanda e Re, i cili bëri publikimin përkatës në revistën mjekësore “The Lancet”, vlerësuan (meta-analizë) të gjitha kërkimet e disponueshme (gjithsej 243 studime) që janë bërë deri më tani në mbarë botën për fibrat dhe drithërat.
Shumica e njerëzve në mbarë botën konsumojnë më pak se 20 gram fibra në ditë, ndërsa studimi i ri, i cili do të çojë në rekomandime të reja nga OBSH, këshillon 25 deri në 30 gram në ditë, me sasi edhe më të larta që ofrojnë përfitime shtesë shëndetësore.
Studimi i ri zbuloi gjithashtu se ngrënia e ushqimeve që kanë një indeks të ulët glicemik dhe ngarkesë të ulët glicemike ofron vetëm mbrojtje të kufizuar kundër diabetit të tipit 2 dhe goditjes në tru. Këto ushqime mund të përmbajnë sheqerna, yndyrna të ngopura dhe natrium (kripë), gjë që redukton përfitimet e tyre shëndetësore.
Në vend të kësaj, siç thekson studimi i ri, përfitimet e fibrave dhe drithërave janë më të qarta. “Përfitimet shëndetësore të fibrave mbështeten nga të paktën 100 vjet kërkime,” tha Mann.
Megjithëse studimi nuk tregoi se fibra përbën ndonjë rrezik, studiuesit vunë në dukje se marrja e lartë e fibrave mund të ketë efekte anësore për ata me nivele të ulëta të hekurit ose elementëve të tjerë gjurmë, sepse fibrat dhe drithërat mund të ulin më tej nivelet e hekurit në trupi.
Përveç drithërave të plota, shumë fibra gjenden në bishtajore, perime dhe fruta.
NDIQE LIVE "PANORAMA TV" © Panorama.al
