Presidenti rus, Vladimir Putin, ka kërcënuar Perëndimin lidhur me dhënien e autorizimit Ukrainës për përdorimin e raketave me rreze të gjatë veprimi.
Putin ka deklaruar se nëse Perëndimi lejon Ukrainën të kryejë sulme në territorin rus me raketa që i janë furnizuar Kievit nga vendet perëndimore, kjo sipas tij do të fusë vendet e NATO-s në luftë me Rusinë.
“Nëse merret ky vendim, nuk do të thotë asgjë më pak se përfshirja e drejtpërdrejtë e vendeve të NATO-s në luftën në Ukrainë. Kjo do të ndryshonte vetë natyrën e luftës. Kjo do të thotë se vendet e NATO-s janë në luftë kundër Rusisë”, tha Putin në një video të postuar nga presidenca ruse.
Megjithatë, pak më herët, Rusia raportoi se kishte rimarrë 10 fshatra në rajonin e Kurskut, ku Ukraina nisi një pushtim në shkallë të gjerë muajin e kaluar.
“Trupat çliruan 10 vendbanime në vetëm dy ditë”, tha ministri rus i Mbrojtjes në një postim në Telegram.
Ndërkohë, kushte të reja po krijohen nga agresioni rus në frontin e luftës me Ukrainën, gjë që e vë komunitetin perëndimor në një gjendje shqetësimi dhe alarmi për nivelin e mbështetjes që do t’i japë Kievit.
Volodymyr Zelensky tha më herët se ushtria ruse ka filluar kundërsulmin në rajonin perëndimor të Rusisë, Kursk dhe se Ukraina priste një kundërsulm.
NDIQE LIVE "PANORAMA TV" © Panorama.al
