Kryeministri Edi Rama dhe Ministrja e Arsimit dhe Sportit, Ogerta Manstirliu, vizituan sot shkollën “Vaçe Zela” në Tiranë, një nga 200 shkollat e pajisura me 216 laboratorë SMART këtë vit, duke krijuar kushtet për nxënësit që të zhvillojnë aftësitë digjitale përmes platformave interaktive.
Ky investim është një hap i rëndësishëm në zgjerimin e programit të kodimit dhe integrimin e Teknologjisë së Informacionit dhe Komunikimit (TIK) në kurrikulën e re shkollore për 35 mijë nxënës të arsimit fillor.
Nxënësit e shkollës “Vaçe Zela” treguan se si përdorin laboratorin SMART për të zhvilluar aftësitë e tyre në lexim, shkrim dhe matematikë përmes zbatimit praktik të teknologjisë. Laboratori ka 18 laptopë dhe një tabelë interaktive, duke ofruar një mjedis të përshtatshëm për zhvillimin e aftësive digjitale në arsimin fillor.
Ministrja e Arsimit dhe Sportit Ogerta Manstirliu tha se ky program i qeverisë shqiptare ka për qëllim të sigurojë që çdo shkollë në vend të ketë infrastrukturën e nevojshme digjitale për të mbështetur një arsimim më cilësor dhe të përshtatur me zhvillimet teknologjike globale.
“Ne po punojmë për të shtrirë rrjetin e laboratorëve SMART në 654 shkolla të tjera, jo vetëm në sistemin 9-vjeçar, por edhe në gjimnaz”, tha Manastirliu.
Ky investim në infrastrukturën digjitale sipas Ministres Manastirliu është një hap i rëndësishëm drejt përmirësimit të cilësisë së arsimit që ecën dhe zhvillohet paralelisht me trajnimin dhe kualifikimin e mësuesve në aftësi digjitale.
“Kjo është faza e parë e investimit, dhe ne po trajnojmë 200 drejtues të shkollave dhe do të fillojmë trajnimin e 400 mësuesve të arsimit fillor këtë muaj. Programi Kombëtar i Zhvillimit Profesional të Mësuesve synon të trajnojë rreth 16 mijë mësues për metodat më efektive të mësimdhënies.”, tha Manastirliu.
Investimet në infrastrukturën digjitale dhe trajnimin e mësuesve janë të rëndësishme për të përgatitur nxënësit për sfidat e shekullit XXI.
NDIQE LIVE "PANORAMA TV" © Panorama.al
