Ish-presidenti i Ukrainës, Petro Poroshenko, është shprehur se furnizimi me armë nga Koreja e Veriut për Rusinë nuk do të ndryshonte ndjeshëm rrjedhën e luftës në Ukrainë.
Duke folur për raportet se presidenti rus, Vladimir Putin, mund të mirëpresë liderin e Koresë së Veriut, Kim Jong Un në Rusi për të diskutuar marrëveshjet e mundshme të armëve këtë muaj, Poroshenko i tha Sky News se kjo dëshmon “izolimin e plotë” të Putinit gjatë konfliktit në Ukrainë.
Ai tha se “miqtë” e Moskës janë Koreja e Veriut, Siria dhe Irani, të cilat ai i quajti “paria ndërkombëtare”.
“Municionet e Koresë së Veriut definitivisht nuk do ta ndihmojnë Rusinë as të ndalojë operacionin kundërsulmues ukrainas”, tha Poroshenko.
Megjithatë, ai tha se nëse Koreja e Veriut furnizon armë, Kievi do të kërkojë më shumë armë nga partnerët perëndimorë dhe krijimin e sanksioneve më të ashpra ndaj vendeve që ofrojnë ndihmë me armë për Rusinë.
I pyetur për ecurinë e kundërofensivës së Kievit, Poroshenko i tha Sky News “nuk është si Hollywood” ku “ulesh me kokoshka”, por është një “operacion shumë i vështirë”.
Ai tha se ka marrë pjesë në funeralet për tre nga miqtë e tij më të ngushtë vetëm këtë javë.
Ish-presidenti i kërkoi Perëndimit t’i “besojë” Ukrainës dhe konfirmoi se forcat ukrainase kanë thyer linjat e para të mbrojtjes ruse.
“Tani situata është pak më optimiste se më parë,” shtoi ai.
NDIQE LIVE "PANORAMA TV" © Panorama.al
