Eksperti i sigurisë, Nuredin Ibishi, foli sot përmes Skype lidhur me sulmin e 29 nëntorit në kanalin Ibër-Lepenc në veri të Kosovës.
Ekpserti i sigurisë tha për emisionin “Open” në News 24 se sulmi i 29 nëntorit ishte një akt terrorist i mirë menduar. Ai e paralelizoi sulmin në veri të Kosovës me aktet që forcat ruse po bëjnë kundrejt Ukrainës duke sulmuar infrastrukturën energjetike të vendit.
Ibishi tha më tej se Serbia vazhdon të insistojë që hetimet për këtë rast të bëhen nga hetuesit serbë, duke nënçmuar dhe injoruar në këtë mënyrë policinë dhe institucionet e Kosovës.
Nuredin Ibishi: Së pari mendoj se është një prej sulmeve më të rënda të pas luftës në Kosovë. Kjo tregon atë çka ndodhi në 24 nëntor të vitit të kaluar ku grupi terrorist tentoi aneksimin e veriut të Kosovës. Kanali furnizon gati gjysmën e banorëve me ujë të pijshëm, furnizon 5 qytete, kjo nënkupton një bllokadë tërësisht të sistemi edhe furnizimit të energjisë elektrike dhe furnizimin me ujë. Akt terrorist, sulm hibrid sikur se po ndodh edhe me luftën në Ukrainë me forcat ruse duke sulmuar infrastrukturën kritike në ditët e ftohta të dimrit.
Policia e Kosovës është në gjurmë të zbulimit të kësaj ngjarje. Mendoj që ky akt terrorist është përgatitur mirë, është shumë i cilësuar mirë, i targetuar që të arrijë qëllimin në shumë drejtime.
Serbia vazhdon të qëndroje në atë që hetimi të bëhet nga organet e hetuesisë serbe, ka nënçmim për Kosovës, vazhdon të injorojë institucionet, policinë e Kosovës. Janë 2 organizata terroriste, pjesëtar të cilët janë të arrestuar, por nuk i mbështesim shumë deklaratat politike. Qysh moti dy grupet terroriste serbe e kanë pajisur popullatën me arsenal armatimi.
Autoritetet e Kosovës e kanë cilësuar sulmin ndaj infrastrukturës kritike si terrorist dhe e kanë fajësuar Serbinë. Beogradi, ndërkaq, ka mohuar se është përfshirë në këtë sulm dhe ka thënë se po kryen hetimet e veta për këtë rast.
Sulmi ka ndodhur në fshatin Varragë të komunës së Zubin Potokut – komunë me shumicë serbe në veri të vendit.
Policia e Kosovës ka thënë se sulmi është kryer me lëndë shpërthyese deri në 20 kilogramë.
Kanali Ibër-Lepenc furnizon me ujë nga Liqeni i Ujmanit gjithë veriun e Kosovës, rajonet e Mitrovicës, Prishtinën me rrethinë, si dhe Korporatën Energjetike të Kosovës për ftohjen e termoelektranave të saj.
Sulmi në Zubin Potok është dënuar ashpër nga faktori ndërkombëtar.
Po ashtu, para se të ndodhte sulmi në Zubin Potok, kishte pasur edhe dy incidente me mjete plasëse në veri, një në afërsi të Komunës së Zveçanit dhe një sulm me granata dore në stacionin policor në këtë komunë.
NDIQE LIVE "PANORAMA TV" © Panorama.al
